Տարբեր քննչական մարմիններում քննվում է 200 մլն դոլարի չարաշահումների, վատնումների վերաբերյալ քրեական գործ. Ն. Փաշինյան

13:01 • 01.11.18

Մեր գյուղատնտեսությունը շարունակում է չհամապատասխանել ժամանակակից պահանջներին՝ ոռոգման ջրի, վնասատուների դեմ պայքարի և այլնի առումով: Այս մասին ԱԺ-ում հայտարարեց վարչապետի պաշտոնակատար Նիկոլ Փաշինյանը:

«Մենք այսքան ասում ենք ստվերային տնտեսություն, բայց մեր երկրում կան ստվերային այգիներ: Այո, հեկտարներով այգիներ, որոնք ոչ մի տեղ հաշվառված չեն, որ դրա համար հարկեր չվճարեն: Ամեն անգամ, երբ տարեսկզբին պլանավորում ենք ոռոգման ջրի անհրաժեշտ ծավալները, տարվա կեսին պարզվում է, որ դրանք սպառվել են, ոչ մեկը չի կարող բացատրել, թե որտեղ է ջրի քանակը, որոնք, ըստ պաշտոնական թվերի, մեզ պետք է բավականացներ»,- ասաց Նիկոլ Փաշինյանը:

Նա նշեց, որ կա նաև հակառակ երևույթը՝ հավելագրումների տեսքով:

«Սա կոնյակի արտադրության հետ է հիմնականում կապված: Հայկական կոնյակը բրենդ է, բայց ցավոք Հայաստանում դեռ կան ընկերություններ, որոնք հայկական կոնյակ բրենդի ներքո արտադրում են ոչ հայկական կոնյակ: Ներկրվում է սպիրտ, ներկայացվում են խաղողի կեղծ մթերումներ, ունենում ենք թվերի անհամապատասխանություն»,- նշեց Փաշինյանը:

Վարչապետի պաշտոնակատարն ասաց, որ այս տարի իրենք խիստ են եղել, հավելագրումների մեխանիզմը բավարար չափով չի աշխատել, նաև դա է պատճառը, որ կա լուրջ անկում գյուղատնտեսական ոլորտում՝ տնտեսական աճի հետ կապված:

Ըստ նրա՝ այս տարի եղել է աննախադեպ երևույթ, Հայաստան լոլիկ է ներկվել Վրաստանից և այլ տեղերից, որովհետև առաջարկի ու պահանջարկի հաշվարկը չի կատարվել պատշաճ մակարդակով:

«Կա ևս մեկ գործոն, որն ազդում է տնտեսական աճի վրա: Դա բյուջեի ծախսային մասի թերակատարման խնդիրն է: Հեղափոխությունից հետո թերակատարման ռեժիմով ենք գնում: Պատճառը կոռուպցիայի դեմ պայքարի մեր քաղաքական գիծն է: Բազմաթիվ ծրագրեր իրականացվում են ոչ արդյունավետ, և սպիտված ենք եղել ամեն ծրագրի վերաբերվել առանձնակի ուշադրությամբ»,- նշեց Նիկոլ Փաշինյանը:

Նա ասաց, որ տարբեր քննչական մարմիններում քննվում է 200 մլն դոլարի քրեական գործ՝ չարաշահումների, վատնումների վերաբերյալ:

«Մենք լրջագույն քննության ենք ենթարկում Հյուսիս-Հարավ ավտոճանապարհի կառուցման գործընթացը: Տրանշ 1 ծրագրի շրջանակում իրականացված շինարարությունը չի համապատասխանում որակական չափանիշներին, և մենք հետևելու ենք, որ ճանապարհը բերվի պատշաճ մակարդակի: Սա մենք կանենք՝ քրեական, քաղաքացիական գործերի շրջանակում, թե բանակցությունների միջոցով... Մեր ժողովրդի ծախսած միջոցները պետք է արդյունավետ լինեն: Ճանապարհի փոքր հատվածն է կառուցել, և նույնանման մոտեցումները պետք է վերանան, որ ատկատներ կամ եկամուտներ ստեղծելու համար կառուցվի ճանապարհը: Թույլ չենք տալու, որ հին եղանակով շարունակվի»,- ասաց վարչապետի պաշտոնակատարը: