1.500 կմ՝ ոտքով. Մեքսիկան հրաժարվել է ներգաղթյալների «քարավանին» ավտոբուսներ տրամադրել ԱՄՆ սահման հասնելու համար (լուսանկարներ)
Մեքսիկայի իշխանությունները հրաժարվել են ավտոբուսներ տրամադրել Հարավային Ամերիկայից դեպի Միացյալ Նահանգների սահման շարժվող ներգաղթյալների «քարավանի» առաջին խմբի (4.000 մարդ) անդամներին՝ ասելով, որ նրանք ստիպված կլինեն մնացած 1.500 կմ տարածությունը ոտքով անցնել:
Ինչպես նշում է Daily Mail-ը, այժմ «քարավանը», որում կան կանայք, երեխաներ ու հղիներ, շարժվում է դեպի Մատիաս Ռոմերո մեքսիկական քաղաք, որտեղից էլ ուղևորվելու է դեպի Միացյալ Նահանգների սահման:
«Քարավանի» մյուս խումբը, որում ևս հազարավոր մարդիկ կան, գտնվում է առաջինից հետ՝ 321 կմ հեռավորության վրա: Նրանք գտնվում են Տապաչուլա քաղաքում:

Ավելի վաղ «քարավանի» կազմակերպիչները հայտարարել էին, որ մեքսիկական իշխանություններն իրենց խոստացել են 14 ավտոբուս տրամադրել:

Դեպի ԱՄՆ սահման է շարժվում նաև մեկ այլ առանձին «քարավան», որն ավելի սակավաթիվ է՝ մոտ 500 մարդ: Այն ձևավորվել է Էլ Սալվադորում ու ներկայում գտնվում է Գվատեմալայի տարածքում:

Հիշեցնենք, որ Միացյալ Նահանգների նախագահ Դոնալդ Թրամփը Մեքսիկայի հետ սահման է ուղարկել 100 զինծառայողի, որոնք սպասում են Հարավային Ամերիկայից դեպի ԱՄՆ սահման շարժվող ներգաղթյալների բազմահազարանոց «քարավանին»:
Մինչև շաբաթվա վերջ սահմանին կտեղակայվի ամերիկյան 7.000 հոգանոց զորք, մինչդեռ Թրամփն ավելի վաղ հայտարարել էր, որ ցանկանում է զինծառայողների թիվը հասցնել 15.000-ի:

ԱՄՆ նախագահը, որ դեմ է ներգաղթյալներին ապաստան տալուն, նրանց նախազգուշացրել է, որ ամերիկացի զինծառայողներն ի պատասխան իրենց ուղղությամբ նետված քարերի կրակ կբացեն «քարավանի» անդամների ուղղությամբ:

Հայտնի է, որ այս մարդիկ փախչում են իրենց երկրներում սոցիալական ծանր վիճակից ու համատարած բռնությունից: Այնուհանդերձ՝ ԱՄՆ նախագահ Դոնալդ Թրամփը հայտարարել է, որ «քարավանների» շարժն «անիմաստ է», քանի որ ինքը թույլ չի տա նրանց հատել ԱՄՆ պետական սահմանը:











