Ինդոնեզիայում կործանված Boeing 737 ինքնաթիռի «սև արկղերից» մեկի տվյալները վերծանվել են

10:52 • 05.11.18

Ինդոնեզիայի տրանսպորտի անվտանգության հարցերով ազգային կոմիտեն ավստրալացի մասնագետների հետ համատեղ կարողացել է ստանալ օրեր առաջ կործանված Boeing 737 ինքնաթիռի «սև արկղի» տվյալները, այս մասին հաղորդում է Detik պորտալը:

Նշվում է, որ «սև արկղում» առկա է եղել 69 թռիչքային ժամի վերաբերյալ տվյալ, այդ թվում՝ վերջին թռիչքի մասին: Ըստ այդ տվյալների՝ ինքնաթիռը կործանվել է մեծ արագության տակ ջրի մակերևույթին դիպչելու հետևանքով:


Ի դեպ, օդանավի երկրորդ «սև արկղը», որը ձայնագրել է անձնակազմի զրույցը, դեռ չի գտնվել:


Lion Air ավիաընկերության Boeing 737 MAX օդանավը Ջակարտայի օդանավակայանից մեկնելուց 13 րոպե անց անհետացել էր ռադարների էկրանից, ավելի ուշ հաղորդվել է, որ այն ընկել է ծովը՝ Ճավա կղզու արևմտյան ափերի մոտ: Օդանավի բոլոր ուղևորները՝ 189 հոգի, զոհվել են:

Ավելի վաղ հայտնի էր դարձել, որ ինքնաթիռի կործանման վայրում իրականացվող որոնողա-փրկարարական աշխատանքների արդյունքում 26 պայուսակ մարմնի մնացորդ է հավաքվել: