Ինդոնեզիայում ուղևորները հրաժարվել են թռչել դուրիան տեղափոխող օդանավով
Ինդոնեզիայում Sriwijaya Air ավիաընկերության չվերթը հետաձգվել է՝ ուղևորների բողոքի պատճառով, որոնք բողոքել են օդանավում առկա վատ հոտից, հայտնում է Jakarta Post-ը:
Թերթի տվյալների համաձայն՝ ուղևորները, օդանավի սրահում տարածված վատ հոտն առնելով, սկսել են վիճել անձնակազմի հետ՝ իրենց դժգոհությունը հայտնելով: Ինչպես պարզվել է ավելի ուշ, հոտը տարածվել է ուղեբեռային հատվածում գտնվող դուրիան վատ հոտով մրգի խմբաքանակից:
Ավիաընկերությունը որոշում է կայացրել դուրս բերել օդանավից վատ բուրող բեռը, ինչից հետո օդանավը մեկ ժամ ուշացումով կարողացել է թռչել նշանակետ:
Sriwijaya Air-ի ներկայացուցիչը նշել է, որ ընկերությունն այդ միրգը տեղափոխելու իրավունք ունեցել է, սակայն միայն այն դեպքում, եթե բեռը պատշաճ ձևով փաթեթավորված լիներ:
Դուրիանն արևադարձային միրգ է, որը տարածված է Հարավարևելյան Ասիայում: Իր վատ հոտի պատճառով տարածաշրջանի մի շարք երկրներում արգելված է այն տեղափոխել հանրային տրանսպորտով:










