Ֆրանսիայի ֆինանսների նախարարը կոչ է արել Եվրոպան «կայսրություն» դարձնել

10:46 • 12.11.18

Ֆրանսիայի ֆինանսների նախարար Բրյունո Լը Մերը կոչ է արել Եվրոպան «կայսրություն» դարձնել՝ ԱՄՆ-ի ու Չինաստանի նմանությամբ: Այդ մասին նա ասել է Handelsblatt թերթին տված հարցազրույցում:


Ֆրանսիացի նախարարի կարծիքով՝ այդ «կայսրությունը» պետք է խաղաղասեր տերություն լինի, որը հիմնվում է իրավական պետության սկզբունքների վրա:


«Եվրոպան այլևս չպետք է վախենա իր իշխանությունը գործի դնելուց»,- ասել է նախարարը:


Միևնույն ժամանակ, նա ընդգծել է Իրանի նկատմամբ «ապօրինի» ամերիկյան պատժամիջոցներից Եվրամիությունը պաշտպանելու անհրաժեշտությունն ու «Դոնալդ Թրամփի կառավարության ճանապարհին հայտնվելը»:


«Այստեղ խոսքն այն մասին է, որ ԱՄՆ-ին հստակ ասենք՝ մենք ինքնիշխան մայրցամաք ենք, և մենք ենք որոշում՝ ում հետ առևտուր անել»,-ասել է Լը Մերը:


Օրերս էլ Ֆրանսիայի նախագահ Էմանուել Մակրոնն առաջարկել էր ԱՄՆ-ից անկախ «համաեվրոպական բանակ» ստեղծել, այդ թվում՝ կիբեռանվտանգության համար: Թրամփն իր ֆրանսիացի գործընկերոջ առաջարկը «շատ վիրավորական» էր անվանել: