Կալիֆոռնիայում հրդեհներին կարող են փոխարինել հորդառատ անձրևները՝ իրենց հետ բերելով ջրհեղեղի ու սողանքների վտանգ
ԱՄՆ Կալիֆոռնիա նահանգին պատուհասած խոշոր անտառային հրդեհներին կարող են փոխարինել հորդառատ անձրևները, որոնք ջրհեղեղի ու սողանքների պատճառ կդառնան, այս մասին «РИА Новости»-ին հայտնել է նահանգի հրդեհային վարչության ներկայացուցիչ Ջոնաթան Կոքսը:
«Մենք անձրևներ ենք ակնկալում մեկ շաբաթից: Դա մեզ համար կարևոր է, անձրևները վաղուց պետք է տեղային: Սակայն մենք անհանգստանում ենք, որ այդ շրջաններում կարող են առաջանալ սողանքներ ու ջրհեղեղներ», - ասել է պաշտոնյան:
Նա հիշեցրել է, որ նահանգում շարունակում է ամբողջովին չմարված մնալ երկու խոշոր հրդեհ՝ Բյուտ շրջանի Փերըդայզ քաղաքի շրջակայքում, ինչպես նաև՝ Մալիբու շրջանում:
Հայտնի է, որ Բյուտ շրջանում բարդ իրավիճակը պահպանվում է հատկապես արևելյան մասում:
Մինչ այժմ հաստատվել է, որ հրդեհների հետևանքով զոհերի թիվը հասել է 58-ի:
Հիշեցնենք, որ այս անտառային հրդեհները Կալիֆոռնիայի պատմության մեջ ամենամահաբեր ու պատճառած նյութական վնասի չափով խոշորագույնն են, որոնք արդեն «կուլ են տվել» 8.650 տուն և 106 բնակելի շենք, մինչդեռ ավերված շինությունների ընդհանուր թիվը 10.321 է:
Նշվում է, որ հրդեհի տարածման դեմ պայքարում է մոտ 10.000 հրշեջ, որոնց օգնում են նաև հատուկ այդ նպատակով ազատ արձակված կալանավորները:










