Այս ցուցակներով կազմված խորհրդարանը լուրջ քաղաքական գործառույթ չի իրականացնելու. Ա.Բաղդասարյան (տեսանյութ)
Արտահերթ խորհրդարանական ընտրություններին մասնակցող քաղաքական ուժերի ուժերի ցուցակները գոհացնող չեն,այդ թվում «Իմ Քայլը» դաշինքինը, այդ ցուցակներով կազմված խորհրդարանը լուրջ քաղաքական գործառույթ չի իրականցնելու: Այս մասին Tert.am-ի հետ զրույցում ասաց քաղաքական վերլուծաբան Արմեն Բաղդասարյանը:
«ՔՊ-ի ցուցակը կարող էր և ավելի վատը լիներ, դա ոչ մեկին դուր չի եկել, շատ վիճահարույց ցուցակ է, բայց հասկանում եմ նաև, որ հասարակության ակնկալիքները չափազանց մեծ էին, և այնտեղ ինչ ցուցակ էլ լիներ, էլի քննադատության էր արժանանալու: Ուղղակի էդ ցուցակի 80 տոկոսին ես ինքս չեմ ճանաչում, հասարակությունն էլ չի ճանաչում, լավ կլինեն, թե վատ, դժվար է ասել: Հիացած չեմ ոչ մի կուսակցության ցուցակով, մտահոգիչն այն է, որ այդ ցուցակներով կազմված խորհրդարանը լուրջ քաղաքական գործառույթ չի իրականցնելու երկրի ներքաղաքական կյանքում: Ես այնտեղ չեմ տեսնում մարդիկ, ովքեր լրջագույն հարցեր կբարձրացնեն, քննարկումներ կանեն, հարկ եղած դեպքում՝ կառարկեն կառավարության բերած նախաձեռնություններին, համարձակություն կունենան դեմ քվեարկել, սկզբունքային դիրքորոշում կներկայցնեն: Ես առաջին հերթին ՔՊ-ի ցուցակը նկատի ունեմ»,-շեշտեց նա:
Անդրադառնալով հարցին՝ արդյոք ցուցակից կարող ենք եզրահանգել, որ ՔՊ-ն, որպես կուսակցություն, դեռ կայցած չէ` հաշվի առնելով նաև ՔՊ-ական շրջանառվող նախնական տեսակետները կարգախոսի ընտրության վերաբերյալ:
«Ճիշտն ասած՝ ես լսեցի, որ կարգախոսը կարող է լինել «Նիկոլ վարչապետ», ինձ թվաց, թե դա քաղաքական բավականին անհաջող հումոր է, վստահ եմ, որ քննարկումներից հետո այդպիսի կարգախոս չի ընտրվի, չի կարելի այդպիսի կարգախոսով գնալ ընտրություններին: Դա կոպիտ սխալ է, կարգախոսն իր մեջ պետք է պարունակի տվյալ քաղաքական ուժի ծրագրերը, զարգացման տեսլականը: Պետք է հռչակել նպատակը, ոչ թե ձևը: Համոզված եմ` ՔՊ-ում կան ողջամիտ մարդիկ, ովքեր մի կողմ կդնեն այդ կարգախոսը և կասեն՝ դա քաղաքական, գուցե, անհաջող հումոր էր»,-շեշտեց նա:
Անդրադառնալով ՀՀԿ-ին՝ Արմեն Բաղդասարյանն ասաց, որ որպես ընդդիմություն, հասարակությունն իրենց չի ընկալում, նրանց հետ հույսեր չի կապում: Ըստ նրա` երկրորդ ուժը մնալու հեռանկար ունի ԲՀԿ-ն:
Մանրամասները` տեսանյութում:










