Պետք է գնանք արտաբյուջեների վերացման ճանապարհով. չնայած փոխվարչապետի համոզմանը՝ հարցը օրակարգում չներառվեց

16:51 • 19.11.18

Այսօր կառավարության արտահերթ նիստ տեղի ունեցավ, որը վարում էր ՀՀ փոխվարչապետի պաշտոնակատար Արարատ Միրզոյանը, քանի որ վարչապետի պաշտոնակատար Նիկոլ Փաշինյանն աշխատանքային այցով գտնվում է Գեղարքունիքի մարզում:

Ֆինանսների նախարարի պաշտոնակատար Ատոմ Ջանջուղազյանն առաջարկեց օրակարգում ներառել արտաբյուջեներից հրաժարվելու խնդիրը: «Մենք եկար քննարկել ենք, բայց ժամանակը չի բավարարել, հաշվի առնելով նաև ներքին զարգացումների արագացման աստիճանը, որ մինչև վերջ տրամաբանական ավարտին հասցնենք մի հարց, որը կապված է մի շարք օրենքների փոփոխությունների հետ, որոնք ենթադրում են, որ արտաբյուջետային հաշիվների հետ կապված փոփոխություն կառաջացնի, եթե դեմ չեք, այս հարցը ներառենք օրակարգում»,-ասաց նա:

Փոխվարչապետի պաշտոնակատար Տիգրան Ավինյանը նկատեց, որ հարցը քննարկվել է կոմիտեի նիստին րոպեներ առաջ: «Կարծում եմ, որ այնտեղ քննարկելու դեռ շատ բան կա, և հարցը կոմիտեի նիստին հավանության չի արժանացել: Ես կարծում եմ, որ կարելի է կազմակերպել հետագա քննարկումներ ու միայն դրանից հետո վերադարձնել կոմիտեի նիստ, ապա բերել կառավարության նիստ»,-ասաց նա:

Ատոմ Ջանջուղազյանն առաջարկեց քվեարկել հարցն օրակարգում ներառելու հարցը, քանի որ բոլորը չեն եղել կոմիտեի նիստին: «Հարցը սկզբունքային նշանակություն ունի, կա´մ գնում ենք այդ ճանապարհով, կա´մ չենք գնում, կարող ենք հայտարարել, որ հիմա չենք գնում այդ ճանապարհով, նպատակահարմար չէ և չքննարկենք, բայց կառաջարկեի այդ որոշումը կայացվեր»,-ասաց նա:

Արարատ Միրզոյանի հարցին, թե ինչ կլինի, եթե մեկ ամսով հետաձգվի այս հարցը, Ատոմ Ջանջուղազյանն ասաց, որ երկու ծայրահեղ պատասխան կարող է տալ: «Բացարձակապես ոչինչ, քանի որ քսանյոթ տարի չենք անդրադարձել կամ էպիզոդիկ դրվագային ենք անդրադարձել և ոչ մի անգամ չի հաջողվել այս հարցը վերջին հասցնել»,-ասաց նաև նշեց, որ Ֆինանսների նախարարությանը հաջողվել է ազատվել այդ կարծրատիպից, թե առանց արտաբյուջեի հնարավոր չէ ապրել:

Արարատ Միրզոյանն առաջարկեց հարցն ընդգրկել օրակարգում, իսկ փոխվարչապետ Տիգրան Ավինյանը նշեց, որ դա երկար ընթացք կպահանջի, կարելի է այս հարցը տեղափոխել այլ հարթակներ, մանրամասն քննարկել, նախապատրաստել կոնկրետ նախագիծ, որը բոլոր ռիսկերին կտա պատասխաններ և նոր դնել քննարկման:

Այսպիսով՝ Ատոմ Ջանջուղազյանի առաջարկած՝ արտաբյուջեների վերացման հարցը օրակարգում ներառելու հարցին կողմ քվեարկեց հինգ հոգի, դեմ՝ յոթ: «Առաջարկը չանցավ, ես ուզում եմ շնորհավորել բոլորիս, պարո´ն Ջանջուղազյան, որովհետև իրականում ռեֆորմների ճանապարհն իսկապես փշոտ է, սա մի լուրջ հարց է, որը մշտապես տարբեր գերատեսչությունների շահերի և հետաքրքրությունների կենտրոնում է եղել: Վստահաբար մենք պետք է գնանք արտաբյուջեների վերացման ճանապարհով, ափսոս մինչ այս պահը անհրաժեշտ խորությամբ հարց երևի չի քննարկվել, և գերատեսչությունները դեռևս գնում են իներցիայով, գերատեսչական շահը պաշտպանելու ճանապարհով»,-ասաց նա և նշեց, որ պետք է հրաժարվել այդ գայթակղությունից, ինչպես, օրինակ՝ Ֆինանսների նախարարությունն է հրաժարվել, բայց նրանց կյանքը դրանից չի տուժել:

«Արտաբյուջեներով ոչ թափանցիկ զանազան հոսքերի կառավարում չի լինելու, արտաբյուջեներից պետք է հրաժարվել»,-հավելեց Արարատ Միրզոյանը: