Հրապարակվել է սաուդցի սպանված լրագրողի նամակագրությունը, որում նա իշխանությունների դեմ բողոքի շարժում ստեղծելու ծրագիր է քննարկել. CNN
Սաուդցի ընդդիմադիր լրագրող Ջամալ Խաշոգջին անձնական նամակագրության մեջ երկրի իշխանությունների դեմ բողոքի շարժում ստեղծելու ծրագիր է քննարկել, և հնարավոր է, որ նրան սպանել են հենց այդ պատճառով, հայտնում է ամերիկյան CNN-ը:
Մոնռեալցի ակտիվիստ Օմար Աբդուլազիզը լրատվամիջոցին է տրամադրել WhatsApp-ով Խաշոգջիի հետ փոխանակած հաղորդագրություններ, լուսանկարներ, ձայնագրություններ և տեսագրություններ: Ինչպես երևում է նամակագրությունից՝ լրագրողը շատ մտահոգ է եղել երկրում տեղի ունեցող իրադարձությունների առնչությամբ:
«Ինչքան շատ մարդ է զոհում, այնքան շատ է ուզում զոհել. չեմ զարմանա, եթե սկսի հետապնդել նաև իր աջակիցներին»,- գրել է Խաշոգջին Սաուդյան Արաբիայի թագաժառանգ արքայազն Մուհամեդ բին Սալմանի մասին՝ մայիսին:
Երկու տղամարդիկ սկսել են ծրագրել առցանց երիտասարդական շարժման կազմակերպումը, որը պետք է Սաուդյան Արաբիայի իշխանություններին և թագաժառանգ արքայազնին պատասխանատվության ենթարկեր: Ծրագիրը կրում էր «Կիբեռմեղուներ» անվանումը և ենթադրում էր համացանցում հարթակի և կարճամետրաժ ֆիլմերի ստեղծում, որում կցուցադրվեին երկրում մարդու իրավունքների խախտումները:
Խաշոգջիին հաջողվել էր ֆինանսավորման աղբյուրներ գտնել: Օգոստոսին նա կասկածել էր, որ Սաուդյան Արաբիայի իշխանությունները հետևում են իր նամակագրությանը: Երկու ամիս անց լրագրողը սպանվել է:
Հիշեցնենք, որ Ջամալ Խաշոգջին անհետացել էր հոկտեմբերի 2-ին: Նրան վերջին անգամ տեսել էին Ստամբուլում Սաուդյան Արաբիայի գլխավոր հյուպատոսություն մտնելիս:
Ավելի ուշ Սաուդյան թագավորության իշխանությունները հաստատել էին, որ լրագրողը սպանվել է հյուպատոսության աշխատակցի հետ վիճաբանության ժամանակ, սակայն հերքում են թագավորական ընտանիքի առնչությունը սպանությանը:










