Իշխանության միակ ընդդիմախոսը մենք ենք. «Մենք» դաշինքը բանավեճի է հրավիրում «Իմ քայլը» դաշինքի անդամներին

14:52 • 03.12.18

«Մենք» դաշինքի անդամները՝ Խաչատուր Քոքոբելյանի, Արտակ Զեյնալյանի և Անժելա Խաչատրյանի գլխավորությամբ քարոզարշավ են իրականացնում Կենտրոն համայնքում: Նրանք քաղաքացիներին դաշինքի ծրագրային բուկլետները փոխանցելուց բացի նաև կարկանդակ են հյուրասիրում:

Դաշինքի երկրորդ համար, «Ազատ դեմոկրատներ» կուսակցության նախագահ Խաչատուր Քոքոբելյանն «Ազատության» հետ զրույցում նշեց, որ ավանդույթը փոխանցվել է մեծերից, կարկանդակ բաժանելը բարին ավետելու խորհուրդ ունի:

Հարցին՝ արդյո՞ք կարկանդակներ բաժանելը չի դիտարկվում որպես ընտրակաշառք, Քոքոբելյանն ասաց, որ դա չի հակասում օրենքի տառին, կարկանդակների միջոցով նաև փորձում են զրուցել, շփվել քաղաքացիների հետ, նրանց ներկայացնել դաշինքի մոտեցումները: «Ազատ դեմոկրատներ» կուսակցության ղեկավարը նշեց, որ քարոզարշավի ընթացքում քաղաքական բանավեճերը, ցավոք, բովանդակային չեն, փորձ է արվում ամեն ինչ անձնական դաշտ տեղափոխել:

«Դա միտումնավոր է արվում, քանի որ եթե ասելիք չկա, նշաձողը իջեցնում են, և խոսվում է անձնական բնույթի խնդիրներից: Մենք բոլորովին տարբերվող, ապացուցողական մոտեցումներով հարուստ քաղաքական և տնտեսական ծրագիր ենք առաջարկել մեր հանրությանը և ԱԺ-ում հասնելու ենք նրան, որ քաղաքացին յուրաքանչյուր օր փոփոխություն զգա իր վրա»,- նշեց Քոքոբելյանը:

Նրա խոսքով՝ ամենակարևոր խնդիրը Նիկոլ Փաշինյանը լուծել է, նրան հաջողվել է հեռացնել նախկին ռեժիմին, բայց այսօր, ըստ նրա, փոփոխություններ անելու ժամանակն է, իսկ «Մենք» դաշինքի ծրագիրը՝ հատկապես արտաքին քաղաքական առումով, տարբերվում է բոլոր քաղաքական ուժերի, այդ թվում՝ իշխանության ծրագրից:

«Առաջարկում եմ բանավեճ «Մենք» դաշինքի լիդերների և իշխանության միջև, քանի որ մյուսների ծրագրերը չեն տարբերվում իշխանության ծրագրից: Եվ քանի որ «Մենք» դաշինքը միակ և հիմնական գաղափարական այլընտրանքային մոտեցումներ ունեցող ուժն է, ուստի բանավեճը պետք է լինի երկու ուժերի միջև, որպեսզի հանրությունը տարբերակի այդ երկու մոտեցումները»,- ասաց «Ազատ դեմոկրատներ»-ի նախագահը:

Ինչ վերաբերում է ՀՀԿ-ականների այն հայտարարությանը, որ իրենք են միակ ընդդիմությունը, Խաչատուր Քոքոբելյանը նշեց, որ ՀՀԿ-ն չի կարող ընդդիմություն լինել, քանի որ նրանք, ըստ նրա, իշխանություն էլ չեն եղել: «Այսօրվա իշխանությանը ձեռնտու է նման ընդդիմություն ունենալ, իսկ ՀՀԿ-ն, ավելի շատ նեղացածի կերպար ընդունելով, իշխանության հետ փորձում է ստեղծել մի իրավիճակ, որ երկրում ուրիշ մոտեցում չկա, դա անհեթեթ, էժան հնարք է:

Լավ կլինի, որ ՀՀԿ-ն մերթընդմերթ խորը շունչ քաշի և հիշատակի, թե ինչու է Հայաստանում մենաշնորհն առաջացել, տնտեսական հանցագործություններ եղել, ընտրությունները կեղծվել: ՀՀԿ-ն մեր դառն անցյալն է, իշխանության միակ և գաղափարական ընդդիմախոսը մենք ենք»,- ընդգծեց նա՝ հավելելով, որ առաջին անգամ հանրությունը հնարավորություն ունի ընտրելու թե լավ իշխանություն, թե լավ ընդդիմություն, ով կմատնանշի երկրում առկա խնդիրները, կարևոր նախաձեռնություններով կտանի սպասված լուծումների: