«Նորաձև դարձած միասեռականությունը չի կարող տեղ ունենալ Եկեղեցում». Հռոմի պապ

15:40 • 03.12.18

Հռոմի պապ Ֆրանցիսկոսն անհանգստություն է հայտնել, իր բնորոշմամբ, կարևոր հարցի՝ միասեռականության վերաբերյալ՝ հայտարարելով, որ միասեռական լինելն արդեն «նորաձև» է դարձել:

Ինչպես նշում է The Guardian-ը, կաթոլիկների հոգևոր առաջնորդն ասել է, որ միասեռականությանը հակված են նաև հոգևորականները:

«Միասեռականության հարցը շատ լուրջ է: Այս մասին պետք է պարզել ամենասկզբից»,-ասել է Հռոմի պապը՝ նկատի ունենալով քահանա դառնալ ցանկացողներին:

Նա նկատել է, որ «ժամանակակից հասարակություններում միասեռականությունը նորաձև է դարձել, ու այդ մտածողությունն ազդում է նաև Եկեղեցու կյանքի վրա»:

«Դա ինձ շատ է անհանգստացնում: Ձեռնադրվածների կյանքում սիրո այդ տեսակը չի կարող տեղ ունենալ: Եկեղեցին խորհուրդ է տալիս սիրո այդ տեսակին հակված մարդկանց չձեռնադրել: Նրանց համար ավելի լավ կլինի հրաժարվել հոգևորականի կյանքից, քան թե երկակի կյանքով ապրել»,-ասել է պոնտիֆիկոսը: