Կիևի օդանավակայանում ինքնաթիռը կոշտ վայրէջք է կատարել և դուրս եկել թռիչքուղուց

05:43 • 10.12.18

Կիևի «Բորիսպոլ» օդանավակայանում Բելառուսից ժամանած ինքնաթիռը կոշտ վայրէջք է կատարել, որից հետո դուրս է եկել թռիչքուղուց: Այս մասին հաղորդում է «112 Украина» հեռուստաալիքը՝ հղում անելով ականատեսներին:

Հեռուստաալիքի տվյալներով՝ «Բելավիա» ավիաընկերությանը պատկանող ինքնաթիռը վնասել է լուսարձակներն ու շրջհոսիչը, այլ վնասվածքներ չկան: «Բորիսպոլ» օդանավակայանի տնօրեն Պավել Րյաբիկինի խոսքով՝ միջադեպի բոլոր հանգամանքները պարզելու է բելառուսական կողմը:

«Մենք որոշ ժամանակով փակել էինք թռիչքուղին, որպեսզի մաքրեինք այն: Ինքնաթիռն ինքնուրույն է հասել կայանատեղի», - հայտնել է Րյաբիկինը:

Նշվում է, որ միջադեպի պատճառով մի քանի ինքնաթիռ վայրէջք է կատարել այլ օդանավակայաններում, սակայն «Բորիսպոլում» չվերթներ չեն հետաձգվել: Միջադեպի հետևանքով տուժածների մասին չի հաղորդվել: