Գերմանական լրատվամիջոցները հայտնել են Մերկելի ինքնաթիռի անսարքության պատճառը
Գերմանական Lufthansa ավիաընկերությունը պատասխանատու է A340 ինքնաթիռի հարկադիր վայրէջքի համար, որով կանցլեր Անգելա Մերկելը մեկնել էր G20-ի գագաթնաժողովին: Այս մասին գրում է Spiegel թերթը:
Ինչպես նշում է թերթը, 2009թ.-ին Lufthansa ընկերությունն արդիականացրել է Airbus А340 ինքնաթիռը և այդ ժամանակվանից ի վեր ինքնաթիռի կանոնավոր տեխզննում անցկացրել: Այնուամենայնիվ, 2010թ.-ին ավիափոխադրողն օդաչուներին և Airbus-ին չի տեղեկացրել թվային հաղորդակցման նոր համակարգի մասին:
Թերթի տվյալների համաձայն՝ դա է պատճառը, որ Մերկելի ինքնաթիռի օդաչուները չեն կարողացել ճիշտ արձագանքել տեխնիկական խափանմանը և ստիպված են եղել հարկադիր վայրէջք կատարել, ինչի պատճառով Գերմիանիայի կանցլերն ուշացել էր գագաթնաժողովից և Արգենտինա մեկնել սովորական չվերթով:
Ավելի վաղ հաղորդվել էր, որ տեխնիկական խնդիրների պատճառով կանցլերին տեղափոխող կառավարական ինքնաթիռը ստիպված էր եղել հարկադիր վայրէջք կատարել Բեռլինից մեկնելուց անմիջապես հետո:











