«Նրա արվեստը դիմակայել է ժամանակի և սահմանների փորձությանը». այսօր Ազնավուրը կդառնար 95 տարեկան. Russia Today-ի անդրադարձը

1924թ. մայիսի 22-ին Փարիզում լույս աշխարհ է եկել աշխարհի ամենահայտնի երաժիշտներից մեկը՝ ֆրանսահայ շանսոնյե Շառլ Ազնավուրը, որն ավելի ուշ ճանաչվել է 20-րդ դարի լավագույն էստրադային արտիստ:

Այսօր Ազնավուրը կդառնար 95 տարեկան: Այս կապակցությամբ Russia Today կայքն անդրադարձ է կատարել 2018թ. հոկտեմբերի 1-ին կյանքից հեռացած լեգենդար շանսոնյեին:

Իր կարիերայի ընթացքում Ազնավուրը գրել է ավելի քան 1300 երգ, նկարահանվել 60-ից ավելի ֆիլմում և վաճառել 200 մլն-ից ավելի ձայնասկավառակ: Նրա ստեղծագործությունները ներառվել են այնպիսի հայտնի կատարողների երգացանկերում, ինչպիսիք են Ռեյ Չարլզը, Բոբ Դիլանը, Լայզա Մինելին, Էդիտ Պիաֆը, Խուլիո Իգլեսիասը:

Գտնվելով փառքի և ճանաչման գագաթնակետին՝ Ազնավուրը երբեք չի մոռացել իր հայկական ծագման մասին. Հայոց ցեղասպանության 60-րդ տարելիցի կապակցությամբ նա Ժորժ Գարվարենցի հետ գրել է «Նրանք ընկան» երգը՝ նվիրված 1,5 մլն անմեղ զոհերի հիշատակին:

1988թ. Սպիտակում և Լենինականում տեղի ունեցած ավերիչ երկրաշարժից հետո նա հիմնել է բարեգործական հիմնադրամ:

2008թ. Ազնավուրը ՀՀ անձնագիր է ստացել: