Կոնգրեսականները կրկին Թրամփին կոչ են արել պատժամիջոցներ կիրառել Անկարայի դեմ

ԱՄՆ Կոնգրեսի Ներկայացուցիչների պալատի արտաքին հարցերի հանձնաժողովը Թուրքիա ռուսական C-400 զենիթահրթիռային համակարգերի նոր մատակարարումների ֆոնին երկրի նախագահ Դոնալդ Թրամփին կոչ է արել պատժամիջոցներ սահմանել Անկարայի նկատմամբ: Այդ մասին հայտարարությամբ հանձնաժողովը հանդես է եկել Twitter-ում:

«Նախագահ Թրամփ, դուք պետք է պատժամիջոցներ կիրառեք Թուրքիայի դեմ C-400 ՀՕՊ համակարգեր գնելու համար, ինչպես դա պահանջում է ամերիկյան օրենքը: Թուրքիայի շահերին լավագույնս ծառայում է ԱՄՆ-ի, այլ ոչ թե Կրեմլի հետ գործընկերությունը»,- ասված է հաղորդագրության մեջ:

Ավելի վաղ Ներկայացուցիչների պալատի այդ հանձնաժողովում արդեն կոչ էր արվել պատժամիջոցներ կիրառել Թուրքիայի դեմ՝ C-400-ի գնման պատճառով:

Ինչպես ավելի վաղ հաղորդել էր Tert.am-ը, Մոսկվան սկսել է ռուսական С-400 զենիթահրթիռային համակարգերի երկրորդ մարտկոցի բաղադրիչների մատակարարումն Անկարա:

Հիշեցնենք, որ Ռուսաստանի Դաշնության և Թուրքիայի միջև С-400 համակարգերի գնման շուրջ բանակցությունների մասին առաջին անգամ հայտնի էր դարձել 2016թ.-ի նոյեմբերին, իսկ վաճառքի մասին պայմանագիրը կնքվել էր 2017թ.-ի սեպտեմբերին, ընդ որում՝ ձեռք բերված զենիթահրթիռային 4 միավոր համակարգերի արժեքը 2,5 մլրդ դոլար է կազմել:

President Trump, you must sanction Turkey over its purchase of the S-400 air defense system, as required by U.S. law. Turkey’s interests are best served by partnership with the U.S., not the Kremlin.https://t.co/gEk3HF3WpX

— House Foreign Affairs Committee (@HouseForeign) August 27, 2019