6 զվարճալի առանձնահատկություն, որոնցով ներկայանում է Tesla Cybertruck էլեկտրական պիկապը (լուսանկարներ)

Ամերիկյան Tesla ընկերության Cybertruck էլեկտրական պիկապը, որի շնորհանդեսից օրեր անց արդեն իսկ հազարավոր պատվերներ են ստացվել, մի շարք ուշագրավ յուրահատկություններ ունի, որոնք ներկայացնում է Fox News-ը:

Այն լուսավորվում է

Մեքենան համալրված է ոչ միայն դիմային հատվածի ամբողջ լայնքով տեղակայված լուսարձակող գծով, այլև հավելյալ լուսարձակող վահանակով, որը գտնվում է դիմապակու վերին հատվածում՝ անմիջապես տանիքի տակ:

Այն պատրաստված է տիեզերական դարաշրջանի նյութերով

Cybertruck-ի թափքը պատրաստված է նույն չժանգոտվող պողպատից, որն օգտագործվում է SpaceX Starship հրթիռակրի պատրաստման ժամանակ:

Ղեկը շրջանաձև չէ

Մեքենայի ղեկը ներկայանում է ոչ թե օղակի տեսքով (շրջանաձև), այլ նմանեցվել է օդանավերի ուղղանկյունաձև ղեկին:

Ամուր տանիք ունի

Այն պատված է այնպիսի ամուր նյութով, որի վրա կարելի է նույնիսկ քայլել:

Նախատեսված է 6 հոգու համար

Ինչպես որոշ ավանդական պիկապներ, էլեկտրական մոդելը ևս ներկայանում է վեց տեղանոց նստատեղերով:

Մեքենայում կարելի է եփել և քնել

Մեքենան համալրված է հատուկ ճամբարային հանգստի համար նախատեսված վրանով, որը հարմարեցվում է բեռնացիկի հատվածում: Այնտեղ կա հարմարություն ինչպես քնելու համար, այնպես էլ էլեկտրական վառարան՝ պատրաստելու համար: