WhatsApp-ում նոր գործառույթ կհայտնվի. օգտատերերը կարող են ընտրել հաղորդագրության «կյանքի» տարբեր տևողություններ

WhatsApp հավելվածը մշակողները նոր գործառույթ են փորձարկում, որը թույլ կտա որոշակի ժամանակ անց ավտոմատ կերպով ջնջել օգտատիրոջ հաղորդագրությունները, հայտնում է WABetaInfo կայքը:

«Ջնջել հաղորդագրությունները» գործառույթն ավելի վաղ հայտնվել էր Android օպերացիոն համակարգի համար մեսենջերի 2.19.348 բետա տարբերակում: Նշվում է, որ այս գործառույթը մասամբ կիրառվել է ծրագրի ավելի վաղ ներկայացված բետա տարբերակում և կրել է «Անհետացող հաղորդագրություններ» անվանումը:

Մեսենջերի փորձարկման տարբերակում գործառույթը կարելի է միացնել «Կոնտակտային տվյալներ» կամ «Խմբային զրույցի կարգավորումներ» էջանիշերում: Վերջինի դեպքում այն կարող են օգտագործել միայն խմբի ադմինիստրատորները:

Միևնույն ժամանակ, օգտատերը կարող է ընտրել հաղորդագրության «կյանքի» տարբեր տևողություններ` ժամ, օր, շաբաթ, ամիս և տարի: