3D տպիչով «տպված» սուշի. ճապոնացի տեխնոլոգը սուշիի պատրաստման նոր տեխնոլոգիա է մշակել (լուսանկարներ)

3D տպիչ սարքով համեղ և էժան ուտեստի պատրաստումը հնարավոր կլինի 30 տարուց ոչ շուտ: Այս մասին «ՌԻԱ Նովոստի» գործակալությանն է հայտնել ճապոնացի հայտնի դիզայներ-տեխնոլոգը, որը լիովին նոր տեխնոլոգիա է մշակել իր երկրում ավանդական ուտեստի` սուշիի պատրաստման համար:

Ճապոնական Dentsu կորպորացիայի արտ-տնօրեն Ռյոսուկե Սակակին խոստովանել է, որ իր տեխնոլոգիայով «տպված» ուտելիքը դեռ զիջում է ավանդական սուշիին: Նրա խոսքով` դեռ ժամանակ է անհրաժեշտ, որպեսզի նախագիծը կոմերցիոն հաջողություն ունենա և տնտեսական շահույթ ապահովի:

Մասնագետի խոսքով`առաջիկա հինգ տարում «տպված ապրանքները» թանկ կարժենան, սակայն ժամանակի ընթացքում պահանջարկի մեծացմանը զուգահեռ դրանց գինը կնվազի: Վերջինս նաև հավելել է, որ ներկայիս 3D տպիչներով շատ դժվար է լավ արդյունքի հասնել, քանի որ սարքեր են անհրաժեշտ, որոնք կտպեն բջջային և մոլեկուլային մակարդակներում:

3D տպիչների` սուշիի պատրաստման համար քարթրիջները լցված են այնպիսի բաղադրիչներով, ինչպիսիք են` ժելատինը, բրնձի ալյուրը, սոյայի զանգվածը, ջրիմուռները, համեմունքները, սննդային ներկանյութերը, վիտամինները: Դրանցից տպիչի և ռոբոտային ձեռքի շնորհիվ պատրաստվում են տարբեր խորանարդաձև սուշիներ, որոնք չեն կարող պատրաստվել սուշիի սովորական վարպետների կողմից:

Այս տեխնոլոգիայի ստեղծման համար Սակակին ստեղծել է Open Meals նախագիծը` միավորելով դիզայներների, տեխնոլոգների, ծրագրավորողների, գիտնականների և ձեռնարկատերերի: