Ծանոթությունների Tinder հավելվածում ոստիկանությանը կանչելու կոճակ կհայտնվի այն դեպքերի համար, երբ ժամադրությունը ծրագրվածի պես չի անցնի

Ծանոթությունների համար նախատեսված հայտնի Tinder հավելվածում ահազանգի կոճակ կհայտնվի՝ ոստիկաններին զգուշացում ուղարկելու համար, եթե հանդիպման ընթացքում չնախատեսված դեպքեր լինեն: Այս մասին հայտնել է ծառայության հեղինակ, Match Group ընկերության մամուլի ծառայությունը, գրում է Life-ը:

Նշվում է, որ մոտ ապագայում կլինեն մի շարք թարմացումներ, որոնք ուղղված կլինեն օգտատերերի անվտանգությանը: Դրա համար ծառայության հեղինակը մտադիր է Tinder-ում մասամբ ներդնել Noonlight-ի հարթակ, որի օգնությամբ անհրաժեշտության դեպքում հնարավոր կլինի դիմել արտակարգ ծառայություններ:

Անտվտանգությանն ուղղված ևս մեկ քայլ կլինի հավելվածի օգտահաշիվները հաստատելու նոր պահանջները: Այժմ անհրաժեշտ կլինի իրական ժամանակում արված մի քանի սելֆի ուղարկել, որպեսզի բացառվեն կեղծ օգտահաշիվները:

Բացի դա, հնարավwրություն կլինի նշել առաջիկա ժամադրության ամսաթիվը, ինչպես նաև այն, թե ում հետ է այն տեղի ունենալու:

Հավելվածի հեղինակները ենթադրում են, որ սա զսպող գործոն կլինի անցանկալի իրավիճակները կանխելու համար: ԱՄՆ տարածքում օգտատերերի համար նոր հնարավորությունները հասանելի կլինեն արդեն հունվարի վերջին, իսկ հետագայում այն հասանելի կլինի նաև այլ երկրներում: