«Մարսը մեռած մոլորակ չէ». InSight սարքը մոլորակի վրա մոտ 450 սեյսմիկ տատանում է գրանցել (լուսանկարներ)

Միացյալ Նահանգների օդագնացության և տիեզերական տարածության հետազոտությունների ազգային գործակալությունը՝  ՆԱՍԱ-ն, մանրակրկիտ զեկույց է հրապարակել իր կողմից ղեկավարվող InSight  մարսագնացի վերաբերյալ: Փաստաթղթից հայտնի է դառնում, որ սարքը 2018 թվականին Մարս մոլորակի վրա մոտ 450 սեյսմիկ տատանում է գրանցել, հայտնում է BBC-ին: 

Ըստ մասնագետների՝ տատանումները շատ մեծ հզորություն չեն ունեցել հիմնականում տատանվել են 3-4 մագնիտուդի մերձակայքում, ինչը, սակայն, կարևոր «մեսիջ» է իր մեջ պարունակում. այն է` Մարսը մեռած մոլորակ չէ:

«Առաջին անգամ գրանցել ենք, որ Մարսը սեյսմիկ առումով ակտիվ մոլորակ է: Այն ակտիվության մակարդակով գերազանցում է Լուսնին, սակայն հետ է մնում Երկիր մոլորակից»,- նշում է հայտնի հետազոտող Բրյուս Բաներդթը:

InSight-ը Մարսի մակերևույթին վայրէջք է կատարել 2018 թվականի նոյեմբերի 26-ին: