ՆԱՍԱ-ի գիտնականները Մարսի վրա արտասովոր անցք են հայտնաբերել

ՆԱՍԱ-ի գիտնականներն անհասկանալի անցք են հայտնաբերել Մարսի մակերևույթին: Այն նկատել են Mars Reconnaissance Orbiter մարսագնաց սարքից ստացված լուսանկրաներն ուսումնասիրելիս:

Ինչպես ներկայացնում է Корреспондент-ը՝ հղում անելով Օդագնացության և տիեզերական տարածության ուսումնասիրության ազգային գործակալության կայքին, արտասովոր անցքը գտնվում է Կարմիր մոլորակի ամենաբարձր լեռներից մեկի ստորոտին:

Մասնագետներն ուշադրություն են դարձրել կազմավորման արտասովոր ձևին: Այն ունի 35 մետր տրամագիծ, որի շուրջ ձևավորվում է կատարելապես հարթ խառնարանը, իսկ ստորին հատվածում գտնվում է հարթ հատակով քարանձավը:  

Անցքը շրջապատված է լավայով, ինչը հիմք է տալիս մասնագետներին պնդելու, որ այն հրաբխի կողային բացվածքն է:

ՆԱՍԱ-ից հայտնում են, որ հայտնագործությունը «հատուկ ուշադրության» է արժանի, քանի որ մեծ է այնտեղ կյանք հայտնաբերելու հավանականությունը, բացի այդ նման անցքերը հնարավոր է կիրառել որպես թաքստոց տիեզերանավերի և մարսագնացների, հետագայում նաև տիեզերագնացների համար: