Տիեզերական զբոսաշրջիկները 2022թ. կկարողանան Ամանորը դիմավորել ուղեծրի վրա

Երկու տիեզերական զբոսաշրջիկ, որոնք ռուսական «Սոյուզ» տիեզերանավով 2021 թվականի վերջին կմեկնեն Միջազգային տիեզերակայան, կկարողանան առաջին անգամ Ամանորը դիմավորել ուղեծրի վրա, գրում է ria.ru-ն։

2019 թվականի փետրվարին «Ռոսկոսմոս»-ը և ամերիկյան Space Adventures ընկերությունը պայմանագիր են ստորագրել մինչև 2021 թվականի վերջը Միջազգային տիեզերակայան երկու տիեզերական զբոսաշրջիկի թռիչքի վերաբերյալ: Հաղորդվում է, որ «Ռոսկոսմոս»-ն արդեն ձեռնամուխ է եղել «Սոյուզ ՄՍ» տիեզերանավի և «Սոյուզ-2.1ա» հրթիռակրի ստեղծմանը:

Ըստ հաղորդման՝ «Սոյուզ» տիեզերանավի արձակումը՝ երկու զբոսաշրջիկով և ռուս հրամանատար-տիեզերագնացով, ծրագրվում է իրականացնել 2021 թվականի դեկտեմբերին, իսկ վերադարձը Երկիր՝ 2022 թվականի հունվարին: Այսպիսով, զբոսաշրջիկներն առաջին անգամ կկարողանան Նոր տարին տոնել տիեզերքում: