Սահմանամերձ համայնքների հրետակոծված տների վերականգման աշխատանքներն արդեն սկսվել են․ Տավուշի մարզպետ
Սահմանամերձ համայնքների հրետակոծված տների վերականգման աշխատանքներն արդեն սկսվել են։ Այս մասին այսօր Իջևանում լրագրողների հետ հանդիպմանը հայտարարեց Տավուշի մարզպետ Հայկ Չոբանյանը։
«Շինանյութերի մատակարարում է կատարվել։ Այսօր աշխատանքներն իրականացվել են Այգեպար գյուղում, շատ ակտիվ, վաղը կսկսվեն աշխատանքները նաև Ներքին Կարմիրաղբյուր գյուղում։ Այսօր մենք ունեցել ենք շատ խաղաղ օր և բնակիչները կարողացել են վերադառնալ իրենց բնականոն աշխատանքին՝ որքանով դա հնարավոր է»,- նշեց մարզպետը։
Հայկ Չոբանյանի տեղեկացմամբ՝ սահմանին լարվածության աճին, բախումներին զուգահեռ շարունակվում են նաև ճանապարհաշինական և ջրամատակարարման մեծ ծավալի աշխատանքները։ Նրա խոսքով՝ միայն նախօրեին են որոշ չափով սահմանափակվել աշխատանքները՝ թշնամու կողմից հարվածային ԱԹՍ-ներ կիրառելու պատճառով։
«Բնակիչներն ասում էին՝ արդյոք չե՞նք շտապում, բա որ նորից հրետակոծություններ լինեն, իմ պատասխանը հետևյալն է եղել՝ ոչ, մենք պետք է անմիջապես անցնենք նմանատիպ վերականգնողական աշխատանքների»,- ասաց նա:










