Թրամփի եղբոր դուստրը հայտարարել է, որ հարազատները Թրամփին չեն համարել խելացի ու արագ կողմնորոշվող անձնավորություն

11:18 • 18.07.20

ԱՄՆ նախագահ Դոնալդ Թրամփի եղբոր դուստրը՝ Մերի Թրամփը, որը երկրի ղեկավարի վերաբերյալ բավականին տհաճ բացահայտումներով ու պնդումներով աղմկահարույց գիրք է հրատարակել, հայտարարել է, որ հարազատները չեն համարել Թրամփին խելացի ու արագ կողմնորոշվող անձնավորություն: Այդ մասին նա պատմել է CNN հեռուստաալիքի եթերում:

Նրա խոսքով՝ նախկինում Թրամփն ուսման նկատմամբ հետաքրքրություն չի դրսևորել և աչքի չի ընկել հետաքրքրասիրությամբ: Միևնույն ժամանակ, նա չափազանց ինքնավստահ էր և արհամարհանքով է վերաբերվել մարդկանց:

Մերի Թրամփը ենթադրել է, որ իր հորեղբայրն այդ ժամանակվանից ի վեր շատ չի փոխվել:

Մերի Թրամփի «Չափից շատ և երբեք բավարար չէ. Ինչպես ընտանիքս ստեղծեց աշխարհի ամենավտանգավոր մարդուն» վերնագրով գիրքը նվիրված է Սպիտակ տան ղեկավարին և Թրամփ ընտանիքի «մութ պատմություններին»: Հայտնի է, որ վաճառքի հանվելու առաջին օրը սպառվել է 950 000 օրինակ, ինչը ռեկորդային ցուցանիշ է Simon & Schuster հրատարակչության համար:

Հրատարակչությունը գիրքը նկարագրել է որպես «Դոնալդ Թրամփի անկեղծ, ազդեցիկ դիմանկար»՝ ընդգծելով, որ Մերի Թրամփը «լույս է սփռում իրենց ընտանիքի մութ պատմությունների վրա, բացատրում է, թե ինչպես է իր հորեղբայրը դարձել այն մարդը, որն այժմ սպառնում է աշխարհի առողջապահությանը, տնտեսական անվտանգությանն ու սոցիալական կառուցվածքին»։

Հեղինակի խոսքով՝ նա իր մանկության մեծ մասն անցկացրել է Թրամփի շրջապատում՝ այդ տարիներն անվանելով «մղձավանջային, կործանարար և չարաշահման և անտարբերության ողբերգական համադրություն»։

ԱՄՆ նախագահն իր եղբոր դստերը քայլող աղետ էր անվանել և հայտարարել, որ նա իր մասին քիչ բան գիտի: «Մերի Թրամփը սուտ է խոսում իմ և իմ հրաշալի ծնողների մասին, որոնք նրան տանել չեն կարողացել, և խախտում է անձնական տեղեկություններ չբացահայտելու մասին համաձայնագիրը»,- ասել էր Թրամփը:

Մերի Թրամփը Թրամփի հանգուցյալ եղբայր Ֆրեդ Թրամփ կրտսերի դուստրն է։

Տեսանյութը կարող եք դիտել այստեղ: