Աֆղանցի աղջիկը գնդակահարել է իր ծնողներին սպանած «Թալիբան»-ի երկու զինյալներին (լուսանկարներ)
Աֆղանցի աղջիկը գնդակահարել է իր ծնողներին սպանած «Թալիբան»-ի զինյալներին, հայտնել է տեղի ոստիկանության պետը «Ֆրանսպրես» գործակալությանը տված հարցազրույցում, գրում է Daily Mail-ը։
Միջադեպը տեղի է ունեցել Աֆղանստանի Գորի նահանգի գյուղերից մեկում: «Թալիբան»-ի զինյալները ներխուժել են 14-ամյա աղջկա՝ Քամար Գյուլի ընտանիքի տուն և իր աչքի առաջ սպանել հորը՝ երկրի պաշտոնական կառավարությանն աջակցելու համար։ Զինյալները նաև սպանել են ամուսնուն փրկել փորձող նրա կնոջը։
Ոստիկանապետի խոսքով՝ Քամար Գյուլը վերցրել է ընտանիքին պատկանող AK-47 ինքնաձիգը, գնդակահարել է իր ծնողներին սպանած «Թալիբանի» երկու զինյալներին և վիրավորել ևս մի քանիսին։
Նահանգապետի ներկայացուցիչը հայտնել է, որ ներկա պահին աֆղանցի զինվորականները Գուլին և նրա կրտսեր եղբորը տեղափոխել են «ավելի անվտանգ վայր»։













