Արտակարգ դրության ժամանակ խաղաղ հավաքների, մարդու իրավունքների սահմանափակումների հարցով կարիք կա որևէ մարմին ստեղծելու․ մենք նախաձեռնել ենք քննիչ հանձնաժողովի ստեղծում. Տ․ Սիմոնյան

14:15 • 24.07.20

Արտակարգ դրության երկարաձգման նպատակը համավարակն է, թե այդ ընթացքում ինչ իրավունքների սահամանափակում է անհարկի տեղի ունենում, սա հարցի մյուս կողմն է: Այս մասին Tert.am-ի հետ զրույցում հայտարարեց ԱԺ «Լուսավոր Հայաստան» խմբակցության պատգամավոր Տարոն Սիմոնյանը՝ անդրադառնալով հարցին՝ մտահոգի՞չ է արդյոք, որ արտակարգ դրության ռեժիմով պայմանավորված սահմանափակվում են մարդու հիմնարար իրավունքներ, մասնավորապես խաղաղ հավաքների անցկացումը:

«Մենք գտնում ենք, որ հավաքները կամ այլ միջոցառումները կարելի է կազմակերպել՝ որոշակի կանոններ պահպանելով, այլ ոչ թե առհասարակ արգելել միջոցառումների իրականացումը: Մեր իշխանական գործընկերներն այլ պատկերացում ունեն: Ինձ թվում է՝ հիմնական նպատակը արտակարգ դրության երկարացման հենց համավարակի դեմ պայքարն է, բայց ձեռքի հետ էլ, ըստ նրանց, կարելի է ավելի լայն սահմանափակումներ իրականացնել ու չխորանալ այն հարցի մեջ, թե արդյոք կարելի է այդ նույն իրավունքները պաշտպանել առանց սահմանափակումների»,- ասաց նա:

Սիմոնյանը նշեց, որ այստեղ ավելի հեշտ ճանպարհով խնդիրը լուծելու տարբերակն է  ընտրել իշխանությունը․ «Մինչդեռ մեր հարգելի իշխանությունը մոռանում է, որ կան մարդու իրավունքներ, որոնց սահամանափակումը ծայրահեղ դեպքերում պետք է տեղի ունենա»:

Դիտարկմանը՝ վարչապետն այսօր հայտարարեց, որ հիմքեր կան պնդելու` մտել ենք կորոնավիրուսի ճգնաժամը հաղթահարելու փուլ, մեկ անգամ էլ ակնարկել էր, որ հնարավոր է չերկարաձագվի արտակարգ դրությունը և հարցին՝ հնարավո՞ր է՝ արտակարգ դրության ավարտից հետո էլ խաղաղ հավաքների սահմանափակում լինի, նա ասաց, որ եթե օրենքով արտակարգ դրությունն ավարտվում է, որևէ այլ իրավական ակտով հավաքների սահմանափակում չի կարելի իրականացնել:

«Այլ բան է, եթե մեր իշխանությունները որոշեն, որ օրենքում էլ են փոփոխություն կատարում և որոշեն, որ կարելի է նաև առանց արտակարգ դրության հայտարարման սահմանափակել հավաքների ազատության իրավունքը, բայց ես հուսով եմ, որ իշխանությունները նման քայլի չեն գնա»,- ասաց նա:

Հարցին՝ ստեղծված իրավիճակում, երբ սահմանափակված են խաղաղ հավաքների անցկացումը, անհրաժեշտություն կա՞ ինչ-որ մարմին ստեղծելու, որը կզբաղվի այս խնդրով, Սիմոնյանն ասաց, որ իրենք նման անհրաժեշտություն տեսել են և այդ պատճառով էլ նախաձեռնել եք քննիչ հանձնաժողովի ձևավորում: «Այդ հանձնաժողովը պետք է քննարկի, թե արդյոք կառավարության և պարետատան կողմից ձեռնարկված միջոցառումները արդյունավե՞տ են եղել համավարակի դեմ պայքարում և առանձին կետով էլ պետք է այդ քննիչ հանձնաժողովը պատասխանի այն հարցին՝ արդյոք մարդու իրավունքների սահմանափակումները համաչափ են եղել արտակարգ դրության պայմաններին, թե՝ ոչ»,- ասաց նա:

Իսկ թե արդյոք այս հարցի մասով հանրային քննարկումներ կազմակերպելու կարիք կա, Սիմոնյանը նշեց, որ հանրային քննարկումների կարիք միշտ կա և քննիչ հանձնաժողովի աշխատանքները նաև որոշակի առումով հրապարակային պետք է լինեն: Ըստ նրա, իհարկե, կարող են որոշակի հարցեր լինեն, որ փակ լինեն, բայց կարծում եմ, որ մեծամասամբ հրապարակային պետք է լինեն և հանրությունը պետք է նաև լսի, թե ինչ քննարկումներ են տեղի ունենում, հարկ եղած դեպքում՝ նաև մասնակցի:

Նա տեղեկացրեց, որ քննիչ հանձնաժողովն իրավունքի ուժով արդեն ստեղծվել է, և ԱԺ-ի առաջին իսկ նստաշրջանում պետք է ձևավորվի քննիչ հանձնաժողովի կազմը և այդ կազմը քվերակվելու է:

«Մեկ անգամ էլ մենք նախաձեռնեցինք քննիչ հանձնաժողով, բայց իշխող խմբակցությունը տապալեց այն՝ կազմը չհաստատելով, հիմա այս վտանգը կա: Սեպտեմբերի սկզբին երբ նստաշրջանը սկսի, հուսով եմ իշխանական մեր գործընկերները նման քայլի չեն գնա, որովհետև ամբողջ հանրությունն է այսօր պահանջում, որ տրվեն որոշակի հարցերի պատասխաններ, թե արդյոք արդյունավետ է կազմակերպվել համավարակի դեմ պայքարը, և արդյոք իրավունքի սահմանափակումները համաչափ են եղել: Բազմաթիվ հարցեր կան, որոնք հետաքրքրում են հանրությանը և հանրությունը պետք է ստանա այդ հարցերի պատասխանը: Հիմա ես չեմ կարծում, որ իշխանությունները որոշեն, որ իրենք թույլ չեն տալիս, որ հանրությունը ստանա այդ հարցերի պատասխանները»,- ասաց նա:

Ինչ վերաբերում է հանրային քննարկումներին, Սիմոնյանն ասաց, որ քանի որ ԱԺ-ում է տեղի ունենում քննիչ հանձնաժողովի աշխատանքները, ենթադրվում է որ հենց ԱԺ-ի աշխատակազմը քաղաքական իշխանության միջոցով կկազմակերպի, բայց նաև պետք է նշեմ, որ քննիչ հանձնաժողովի նախագահը մեր խմբակցության անդամ Արկադի Խչատյանն է,  նա էլ իր ուժերի ներածի չափով պետք է հնարավորություն բացի հանրային քննարկումների իրականացման, եթե, իհարկե, խոչընդոտներ չլինեն իշխանական գործընկերների կողմից: