Շենքը քանդվում է, 4-րդ կարգի վթարային վիճակ է, բայց քաղաքապետարանը արհամարհում է մեր խնդիրը. վարդաշենցիներն ակցիա արեցին Երևանի քաղաքապետարանի դիմաց (տեսանյութ)

11:06 • 27.07.20

 

Վթարային շենքի բնակիչներից մեկը լրագրողների հետ զրույցում ասաց, որ շենքը ճաքում է, պատերը պահող թերթիկներ են տեղադրել, որոնք երեք ամիսը չլրացած պատռվել են: Ըստ նրա՝ մասնագետները հաստատել են, որ շենքը 4-րդ կարգի վթարային է, համապատասխան փաստաթուղթն ուղարկել են քաղաքապետարան, սակայն Երևանի քաղաքապետ Հայկ Մարությանն այն չի ստորագրում: 

«Խնդիրն այն է, որ քաղաքապետարանը տեղյակ է՝ շենքը 4-րդ կարգի վթարային է, ինչի՞ են արհամարհում բնակիչներին, ինչքա՞ն կարող ենք ահ ու դողով, կարիճների, օձերի մեջ ապրել»,-ասաց նա:

Քաղաքացին նշեց, որ նամակ են գրել նաև վարչապետին, որն իր հերթին այն փոխանցել է քաղաքապետարան, քաղաքապետարանը՝ պետգույքին, որտեղ էլ նշվել է, թե շենքը գնահատվում է որպես 3-րդ  աստիճանի վնասված և ենթակա է ամրացման:

«Չեն եկել ամրացման: 2015 թվականից մեր շենքը պետք է ամրապնդվեր, բայց մինչև հիմա ոչինչ չեն արել: Հասկանում եմ, հարգում եմ, մենք մտնում ենք մեր պետության դրության մեջ, բայց հնարավո՞ր է մի սփոփիչ բան ասել, ինչո՞ւ չեն ասում, ի՞նչն է պատճառը: Թող պարոն Մարությանը գա, մեզ ասի՝ սեյսմիկ կայանը 3-րդ կարգ է ձեզ տվել, ինչի՞ եք պայքարում: Թող՝ ասի, ոչ այն են ասում, ոչ այս, մենք ի՞նչ իմանանք մեր վիճակն ինչ է»:

Ակցիա իրականացնող քաղաքացիներին մոտեցավ Երևանի ավագանու անդամ, ԲՀԿ-ական Միքայել Մանրիկյանը, ով նշեց, որ խնդրից տեղյակ է և ակնհայտ է, որ շենքը 4-րդ կարգի վթարային է: «Օր առաջ այդ հարցը պետք է լուծվի, քաղաքապետարանի ձգձգելու իմաստը մենք չենք հասկանում, իշխանությունն այդ խնդրի լուծմամբ չի զբաղվում»:

Ըստ նրա՝ յուրաքանչյուր 4-րդ կարգի վթարային շենքի բնակիչներին պետք է այլ բնակարան տրամադրեն: « Քաղաքում նման օրինակներ էլի կան, բայց Վարդաշենում բազմաթիվ անգամ եղել ենք և այն պայմանները, որում ապրում են բնակիչները, օր օրի վատանում են և փաստ է, որ այնտեղ հակասանիտարական վիճակ է»,- ասաց նա և շեշտեց, որ կբարձրանա քաղաքապետարան՝ վերցնելու համապատասխան փաստաթուղթը:

Հիշեցնենք, որ վարդաշենցիները բողոքի ակցիան են իրականացնում Երևանի քաղաքապետարանի դիմաց: