Առաջնորդն ու զինված գեներալները. Կիմ Չեն Ընն ատրճանակներ է նվիրել իրեն հավատարմության երդում տված տասնյակ զինվորականների (լուսանկարներ, տեսանյութ)
Հյուսիսային Կորեայի առաջնորդ Կիմ Չեն Ընը Կորեական պատերազմի ավարտի 67-ամյակի կապակցությամբ որպես հուշանվեր ատրճանակներ է նվիրել մի քանի տասնյակ գեներալի:
Ինչպես նշում է Daily Mail-ը, գեներալները, ատրճանակները ձեռքերում հպարտ պահած, շրջապատել են իրենց առաջնորդին ու համատեղ լուսանկարվել:
«Ներկաները վեր են բարձրացրել ատրճանակներն՝ ամենայն վճռականությամբ երդվելով սեփական կյանքի գնով կռվել հանուն Կիմ Չեն Ընի»,-մեջբերում է աղբյուրը Կորեայի կենտրոնական լրատվական գործակալության մեկնաբանությունը:
Ավելի վաղ Կիմ Չեն Ընը հայտարարել էր, որ միջուկային զենքի առկայությունը Փհենյանի համար խաղաղ գոյություն և ազգային անվտանգություն կապահովի:
Կիմ Չեն Ընն այս մասին ասել էր Կորեական պատերազմի ավարտի 67-ամյակին նվիրված միջոցառմանը:
«Որպեսզի թույլ չտայինք ևս մեկ անգամ անցնել 1950-ական թվականների պատերազմի տառապանքների ու ցավի միջով, պետք է ստանայինք պատերազմը որպես այդպիսին զսպելու ու կանխելու ունակ բացարձակ ուժ: Ուստի՝ այնտեղ, որտեղ մյուսներն արդեն հարյուր անգամ ընկած կլինեին ու կհանձնվեին, մենք, հաղթահարելով դժվարությունները, համբերատար դիմանալով ամեն տեսակի հնարավոր սպառնալիքներին ու սադրանքներին, որպես միջուկային տերություն՝ գնում էինք ինքնազարգացման ուղով: Այժմ մենք դարձել ենք այնպիսի երկիր, որը կարող է հուսալի և կայուն պաշտպանվել թշնամական ուժերի ակտիվ սադրանքներից: Պատերազմը զինված հակամարտություն է նրա հետ, ում վերևից ներքև են նայում: Հիմա ոչ ոք չի կարող թերագնահատել մեզ, իսկ թե փորձի՝ համապատասխան գին կվճարի»,-ասել է հյուսիսկորեացի առաջնորդը:
Հիշեցնենք, որ թեև Կորեական պատերազմն ավարտվել է 1953թ. հուլիսի 27-ին, սակայն հրադադարն այդպես էլ չի փոխարինվել խաղաղության հռչակագրով:










