Ուգանդայի լեռնային գորիլաներից մեկին՝ Ռաֆիկիին սպանած տղամարդը դատապարտվել է 11 տարվա ազատազրկման
Ուգանդայի ամենահայտնի լեռնային գորիլաներից մեկին՝ Ռաֆիկիին սպանած տղամարդը դատապարտվել է 11 տարվա ազատազրկման, գրում է BBC-ն։
Ֆելիքս Բյամուկաման մեղավոր է ճանաչվել Բվինդի Ազգային Պարկի տարածք ապօրինի մուտք գործելու և գորիլայի սպանության համար։
Լեռնային գորիլաներն անհետացման վտանգի տակ են․ նրանց թիվը մոտ 1000 է, և, ինչպես ասել է Ուգանդայի վայրի բնության պաշտպանության ընկերակցությունը, «Ռաֆիկին արդարադատության արժանացավ»։
Ռաֆիկին անհետ կորած էր հայտարարվել հունիսի 1-ին, իսկ նրա այլանդակված մարմինը գտել էին հաջորդ օրը՝ Բվինդի Ազգային Պարկում։
Հետաքննությունը ցույց էր տվել, որ Ռաֆիկին սպանվել է սուր առարկայով, որը ներթափանցել է նրա ներքին օրգաններ։
Կենդանասպանն արժանացել է 11 տարվա ազատազրկման․ ձերբակալվել են նաև որսին մասնակից նրա երեք ընկերները։










