Մակրոնն այցելել է Բեյրութ և վստահեցրել լիբանանցիներին, որ օգնությունը կհասնի ժողովրդին և չի հայտնվի «կոռումպացված ձեռքերում» (տեսանյութ)

18:25 • 06.08.20

Ֆրանսիայի նախագահ Էմանուել Մակրոնը ժամանել է Բեյրութ և այցելել պայթյունից տուժած շրջաններ:

Ինչպես փոխանցում է «Ալ-Ջազիրա» հեռուստաալիքը, ֆրանսիացի առաջնորդին այցի առթիվ բազմաթիվ լիբանանցիներ են հավաքվել փողոցներում՝ ողջունելու նրան և խնդրելու՝ օգնել «կոռուպցիոն ռեժիմին վերջ տալուն»: Լիբանանցիները երկրի քաղաքական ղեկավարությանը մեղադրում են երկիրն աղետի հասցնելու մեջ:

«Ես տեսնում եմ ձեր զգացմունքները, ձեր տխրությունը, ցավը, որոնք արտացոլվում են ձեր դեմքին, այդ պատճառով էլ ես այստեղ եմ»,- ասել է Մակրոնը:

Նա խոստացել է ավելի շատ բժշկական և այլ տեսակի օգնություն ուղարկել Լիբանան, մինչդեռ նրան շրջապատող բազմությունը շարունակ վանկարկում էր. «Հեղափոխություն, ժողովուրդն ուզում է ռեժիմի տապալում»:

«Քաղաքական փոփոխությունը նույնպես անհրաժեշտ է: Այս պայթյունը պետք է նոր ժամանակաշրջանի սկիզբ դառնա»,- հայտարարել է Մակրոնը:

«Հուսով ենք, որ օգնությունը կհասնի լիբանանցի ժողովրդին և ոչ թե կոռումպացված առաջնորդներին»,- ի պատասխան՝ նշել է լիբանանցիներից մեկը:

«Երաշխավորում եմ դա. օգնությունը չի հայտնվի կոռումպացված ձեռքերում: Ես կխոսեմ քաղաքական ղեկավարության հետ, ես այստեղ եմ, որ նրանց նոր քաղաքական պայմանագիր առաջարկեմ»,- վստահեցրել է ֆրանսիացի ղեկավարը:  

Հիշեցնենք, որ Բեյրութում հզոր պայթյուն է որոտացել օգոստոսի 4-ին, որի հետևանքով զոհերի թիվը շարունակում է աճել, հազարավոր մարդիկ վիրավոր են, տասնյակ հազարավորները զրկվել են տանիքից: