ԱՄՆ-ն 10 միլիոն դոլար է խոստացել նախագահական ընտրություններին միջամտելու փորձ անող անձանց մասին տեղեկության դիմաց. ТАСС
ԱՄՆ իշխանությունները պատրաստ են 10 միլիոն վճարել նրանց, որոնք տեղեկություններ կհաղորդեն, Վաշինգտոնի կարծիքով, ԱՄՆ ընտրություններին միջամտելու փորձ անող անձանց մասին: Այս մասին, ТАСС-ի հաղորդմամբ, չորեքշաբթի լրագրողների հետ ճեպազրույցի ժամանակ հայտնել է ԱՄՆ պետքարտուղար Մայքլ Պոմպեոն:
«Պետդեպարտամենտի Rewards for Justice (Խմբ.՝ «Վարձատրություն՝ արդարադատությանն օգնելու համար») ծրագիրն առաջարկում է 10 միլիոն դոլար տեղեկության համար, որը կօգնի պարզել օտարերկրյա կառավարության հսկողությամբ կամ կարգադրությամբ գործելով՝ ամերիկյան ընտրություններին միջամտող ցանկացած մարդու ինքնությունը կամ գտնվելու վայրը»,- ասել է նա:
Նշենք, որ ԱՄՆ-ում նախագահական ընտրությունները նախատեսված է անցկացնել 2020 թվականի նոյեմբերի 3-ին։










