«Դուրս մի եկեք փողոցներ, ժողովուրդն իր ընտրությունը կատարել է». համացանցում է հայտնվել Բելառուսի նախագահի ընդդիմադիր թեկնածու Տիխանովսկայայի նոր տեսաուղերձը (տեսանյութ)

17:09 • 11.08.20

Համացանցում է հայտնվել Բելառուսի նախագահի ընդդիմադիր թեկնածու Սվետլանա Տիխանովսկայայի ևս մի տեսաուղերձ, որում նա բելառուսներին կոչ է անում «դուրս չգալ հրապարակներ» և չդիմադրել ոստիկանությանը: Այս մասին տեղեկացնում է «Коммерсантъ» պարբերականը:

Տեսաուղերձի ամբողջ ընթացքում Տիխանովսկայան ներքև է նայում, կարծես կարդում է նախապես պատրաստված տեքստը:

«Բելառուսի Հանրապետության հարգելի քաղաքացիներ: Ես՝ Սվետլանա Տիխանովսկայաս, շնորհակալություն եմ հայտնում ձեզ պետության ղեկավարի ընտրություններին մասնակցելու համար: Բելառուսի ժողովուրդը կատարել է իր ընտրությունը: Երախտիքով և ջերմությամբ դիմում եմ բոլոր այն քաղաքացիներին, որոնք աջակցել են ինձ այս ամբողջ ընթացքում: Բելառուսներ, ես ձեզ խոհեմության և օրենքի նկատմամբ հարգանքի կոչ եմ անում: Ես չեմ ուզում արյուն և բռնություն: Ես խնդրում եմ ձեզ չդիմադրել ոստիկանությանը, դուրս չգալ հրապարակներ, որպեսզի վտանգի չենթարկեք ձեր կյանքը: Պահպանեք ձեզ և ձեր մտերիմներին»,-ասում է Տիխանովսկայան նոր տեսաուղերձում:

«Մեդիազոնա»-ն ուշադրություն է դարձրել այն փաստի վրա, որ տեսանյութը հրապարակել է «Желтые сливы» իշխանամետ թելեգրամյան ալիքը, այնտեղ հղումներ աղբյուրին չեն եղել: Սենյակի պատուհանները, որտեղ տեսանկարահանումը կատարվել է, փակված են շերտավարագույրներով:

BBC-ն նկատում է, որ Սվետլանա Տիխանովսկայան այն նույն հագուստով է, որով երեկ գնացել էր Կենտրոնական ընտրական հանձնաժողով` բողոք ներկայացնելու: Որոշ ԶԼՄ-ներ պնդում են, որ Տիխանովսկայային բռնի ուժով այնտեղ են պահել:  

Ավելի վաղ Բելառուսի նախագահի ընդդիմադիր թեկնածու Տիխանովսկայան տեսաուղերձ էր հղել, որում հաստատել էր, որ լքել է Բելառուսը: Տեսանյութում նա բացատրել էր, որ մեկնել է իր երեխաների մոտ:

«Ես ինքս ինձ համար շատ բարդ որոշում եմ կայացրել: Ես երևի այդպես էլ մնացել եմ այն թույլ կինը, որ կայի ի սկզբանե»,-հայտարարել է Տիխանովսկայան` նշելով, որ դա իր անձնական որոշումն է եղել, որի վրա չեն ազդել ո՛չ ընկերները, ո՛չ հարազատները, ո՛չ էլ թիմակիցները:

Ինչպես ավելի վաղ տեղեկացրել էր Tert.am-ը, Բելառուսի ԿԸՀ-ն հրապարակել է ընտրությունների նախնական արդյունքները. երկրի գործող ղեկավար Ալեքսանդր Լուկաշենկոն հավաքել է ձայների 80,08, իսկ Տիխանովսկայան՝ 10,09%-ը:

Ընտրություններին հաջորդել են բողոքի ակցիաները. Մինսկում երեկ 7 ժամ տևած բախումներից հետո ուժայինները ցուցարարներին հեռացրել են մայրաքաղաքի փողոցներից. արցունքաբեր գազ, ռետինե փամփուշտներ և լուսաձայնային նռնակներ են կիրառվել, կա 1 զոհ:

Մինչդեռ երկրի նախագահ Ալեքսանդր Լուկաշենկոն հայտարարել է, որ հետընտրական բողոքի ակցիայի մասնակիցները ղեկավարվել են Լեհաստանից, Մեծ Բրիտանիայից և Չեխայից՝ հեռախոսակապի միջոցով:

«Մենք պարզել ենք՝ զանգերը եղել են արտասահմանից՝ Լեհաստանից, Մեծ Բրիտանիայից և Չեխիայից: Նրանք զանգահարում էին ու ղեկավարում մեր, կներեք իհարկե, բայց ոչխարներին: Նրանք չեն հասկանում՝ ինչ են անում, բայց նրանց ևս կառավարելու են»,-ասել է Լուկաշենկոն ԱՊՀ Գործադիր կոմիտեի, Համադաշնության դիտորդական առաքելության ղեկավար Սերգեյ Լեբեդևի հետ հանդիպման ժամանակ:

Լուկաշենկոն նաև հայտարարել է, որ թույլ չի տա երկրում «մայդան» անել, և երկիրը պառակտելու փորձերին ադեկվատ պատասխան կտա:

«Թույլ չենք տա պառակտել երկիրը»,-ասել է նախագահը: