Ինչքան շուտ հանենք արտակարգ դրությունը, այնքան մեր քաղաքացիները, հայրենակիցները, որոնք ցանկանում են վերադառնալ կամ մեկնել Հանրապետությունից՝ կշահեն. Էդմոն Մարուքյան
ԼՀԿ ղեկավար Էդմոն Մարուքյանը Ազգային ժողովում ներկայացրեց նախագիծ, որով առաջարկվում էր ՀՀ- ում արտակարգ դրությունը չեղարկել:
Նրա խոսքով`անիմաստ է արտակարգ դրության ռեժիմի պահպանումը, բազմաթիվ սահմանափակումների տեղիք է տալիս՝ Հայաստանից դուրս եկող քաղաքացիների համար: Ըստ նրա՝Հայաստան եկող կանոնավոր չվերթները չեն վերականգնվում և դեռ հարց է՝ թե բանակցությունների արդյունքում այդ չվերթները կվերականագնվեն, թե՝ ոչ:
«Բաց տարածքներում դիմակի կրումը անիմաստ է, փակ տարածքներում`խանութ, գրադարան, հանրային տրանսպորտ՝ պարտադիր է: Պետք է պահպանել փակ տարածքներում դիմակի կրումը, սոցիալական հեռավորությունը և հետևել հիգիենայի կանոներին: Իսկ ինչ վերաբերում է այն հանգամանքին, որ արտակարգ դրության ռեժիմի հանման դեպքում չենք կարող ինքնամեկուսացման ռեժիմը պահել, մենք իրավակարգավորում ունենք, որ եթե մարդը գիտի, որ ինքը վարակակիր է և գիտակցաբար վարակում է այլ մարդկանց, պատասխանատվության է ենթարկվում: Հետևաբար, վարակակրին կարելի է ծանուցել, որ վարակակիր եք՝ մեկուսացեք: Ինչքան շուտ հանենք արտակարգ դրությունը, այնքան մեր քաղաքացիները, հայրենակիցները, որոնք ցանկանում են վերադառնալ կամ մեկնել Հանրապետությունից՝ կշահեն, կշահի նաև տնտեսությունը, և մեր երկիրը: Առաջարկում ենք, որ Խորհրդարանը չեղարկի Կառավարության արտակարգ դրության երկարաձգելու որոշումը, որի արդյունքում Կառավարությունը պարտավորված կլինի արագ գալ Խորհրդարան և արագ ընդունել մյուս օրենքները». ընդգծեց նա:
Էդմոն Մարուքյանը նշեց, որ այժմ ցուցակագրվում են, թե ՀՀ որքան քաղաքացիներ են իրենց անձնական մեքենաներով ցանկանում Վրաստանից վերադառնալ հայրենիք: Նա կարևորեց, որ երբ Հայաստանի Կառավարությունը Վրաստանի հետ սկսի քննարկումները, հրապարակվի, թե որ ժամին և քանի մեքենա է ուղեկցվելու Հայաստանի Հանրապետություն, կարևոր է նաև, որ հնարավորություն տրվի ՀՀ քաղաքացիների գույքը վերադարձնել Հայաստան: Նա նաև նշեց, որ Ռուսաստանի Դաշնության հետ բանակցությունները դեռ ընթացքի մեջ.
«Իմ իմանալով, եթե արտակարգ դրությունը չշարունակվեր, ՌԴ-ը ՀՀ-ի հետ կանոնավոր չվերթները վերականգնելու էր: Հիմա ասվում է, որ այնտեղից կարող են գալ, իսկ եթե այստեղից չեն կարող գնալ, այդ ո՞ր ավիաընկերություններն են պատրաստվում գալ Հայաստան և դատարկ ինքնաթիռով գնալ Հայաստանից, հետևաբար համաձայնությունը պետք է լիներ երկկողմանի»,-եզրափակեց նա:
«Լուսավոր Հայաստան» խմբակցության՝ արտակարգ դրության չեղարկման նախագիծը՝ կողմ՝ 22 և դեմ՝ 68 ձայնով չընդունվեց:










