Ինչո՞ւ մեզ չեն հարգում, մարդ չե՞նք, թքած ունեն մարդկանց վրա. ՌԴ մեկնել ցանկացողները հանդիպեցին Կառավարության ներկայացուցչի հետ
Այսքան ժամանակ կանգնած խնդրում ենք, որ օգնեն մեզ, անտեսում են, ժողովուրդը մեղք է, պարոն Փաշինյան: Այս մասին այսօր լրագրողների հետ զրույցում ասաց Կառավարության դիմաց հավաքված ակցիայի մասնակիցներից Դավիթ Հարությունյանը:
Նշենք, որ նրանք բողոքում են փակ սահմանների դեմ։ Նրանցից մի քանիսը հրավիրվել էին Կառավարության անդամների հետ քննարկման:
Ակցիայի մասնակիցները դուրս եկան Կառավարության անդամների հետ քննարկումից: «Կառավարության ներկայացուցչի հետ խոսեցինք, պարզ է դառնում՝ ոչ մի բանով մեզ չեն ուզում օգնել: Ասում ենք՝ տվեք հնարավորություն, որ մարդկ կարողանան վերադառնալ ու իրենց ընտանիքին միանալ: Ասացին, որ կփոխանցեն այս խնդիրը և կփորձեն այնպես անել, որ և Հայաստանի քաղաքացիները և ՌԴ քաղաքացիները կարողանան գնալ, ոչ մի հստակ պատասխան չտվեցին»:
Ըստ նրա՝ խնդրի մասին փոխանցելով ոչինչ չի կարող փոխվել, Փաշինյանի հետ հանդիպում են պահանջում, որպեսզի կարողանան ելքեր գտնել: «Վիճակն ավելի վատ է, ցուցակումս 2000 մարդու տվյալ կա նույն խնդրով, ամեն օր ինձ զանգում են, լաց են լինում, որ տուն չեն կարող գնալ: Ինչո՞ւ մեզ չեն հարգում, Կառավարությունն առաջինը մարդկանց մասին պետք է մտածի, ոչ թե իրենց մեքենաների, վարորդների մասին, մարդ չե՞նք, թքած ունեն մարդկանց վրա»:
Ակցիայի մասնակցի խոսքով՝ Կառավարությունից ոչ ոք դժվար աշխատանք անել չի ուզում, նույնիսկ ցուցակագրում չի կատարվում, և ինքն ստիպված է լինում ցուցակագրել այն մարդկանց անունները, որոնք կորոնավիրուսի տարածումից հետո Հայաստանում են եղել, նրանց մի մասը ՌԴ քաղաքացի է, իսկ մի մասի ընտանիքներն են այնտեղ, և այսօր նրանք հնարավորություն չունեն վերադառնալ այնտեղ:
«Մենք ասել ենք՝ շատ խնդիրներ կան, բայց կարծես՝ ասած-չասած մեկ էր, պարզապես կանչել էին հանդիպման, որպեսզի հանգստանանք, մարդկանց օգնություն է պետք: Մեզ պետք է, որ Փաշինյանը մեզ հետ խոսի, այսպիսի աշխատողները որևէ հարց չեն լուծում, նորմալ պատասխան չեն տալիս»,- շեշտեց Դավիթ Հարությունյանը:
Ակցիայի մասնակիցներից մեկն էլ ասաց, որ ՌԴ-ից քաղաքացիները կարող են գալ Հայաստան, այսինքն՝ հայկական կողմն իր մասով քայլ է կատարել, մնում է Ռուսաստանը ևս քայլ անի:










