Ճիշտ է, որ նախարարներն ու մարզպետները պարգևավճարներ են ստանում, դա ժողովրդի պատիվն է. դա իմ որոշումն է. Նիկոլ Փաշինյան (տեսանյութ)

18:45 • 17.08.20

Ես այսօրվա այցն ինքս իմ մեջ պայմանականորեն անվանեցի հեղափոխության բերքահավաքը, որովհետև այն ժամանակ, երբ այս տարածքներով շրջում էինք, խոստումներ տվեցինք, այսօր այդ խոստումները կատարվում են: Այս մասին ֆեյսբուքյան ուղիղ եթերում հայտարարեց ՀՀ վարչապետ Նիկոլ Փաշինյանը՝ անդրադառնալով Գեղարքունիքի մարզ կատարած աշխատանքային այցին:

«Այսօր գյուղերում քաղաքակրթական հեղափոխություն է տեղի ունենում: ՀՀ-ն դառնում է մի մեծ շինհրապարակ, գործընթացն սկսվել է, մարդկանց տված խոստումները կատարվում են: Մենք այսօր այս աշխատանքով հող ենք դառնում մեր ժողովրդի ոտքերի տակ, որ նրանք ավելի վստահ քայլեն»,-ասաց Փաշինյանը:

Նա նշեց, թե այս բոլոր աշխատանքները տեսնելով, հարց է առաջացել՝ որևէ մեկը պետք է հարցնի՝ ինչո՞ւ են մեր նախարարները և մարզպետները պարգևավճար ստանում:

«Այսօր այդ հարցի պատասխանը ևս մեկ անգամ ինձ համար գործնական հնչեց՝ ճիշտ են անում, որ ստանում են, դա իմ որոշումն է եղել և ճիշտ որոշում է: Մեր նախարարները, Կառավարության անդամները պետք է ստանան արժանապատիվ վարձատրություն, դա նաև ժողովրդի պատիվն է, որովհետև գործատուի պատիվն է, թե ինքն իր ծառային, աշխատողին ինչպես է պահում և վերաբերվում:

ՀՀ ժողովուրդը պետք է ուրախանա, որ ՀՀ-ում գործում են նախարարներ, որոնք հարյուր հազար, երկու հարյուր հազար, երեք հարյուր հազար պարգևավճարի կարիքն ունեն: Առաջին անգամ է մեր պատմության մեջ, որ մեր երկրում գործում են նախարարներ և մարզպետներ, որոնք ունեն այդ պարգևավճարի կարիքը»,-հայտարարեց նա:

 

 

Մանրամասները՝ տեսանյութում: