20 օր շարունակ ՌԴ մեկնել ցանկացող շուրջ 80 քաղաքացիներ մնացել են Բագրատաշենի անցակետում, ծախսել են բոլոր միջոցները, քնում են նստարաններին. քաղաքացի

11:53 • 19.08.20

Հուլիսի 30-ից՝ 20 օր շարունակ ՌԴ մեկնել ցանկացող շուրջ 80 քաղաքացիներ մնացել են Բագրատաշենի անցակետում, ծախսել են բոլոր նյութական միջոցները, քնում են նստարաններին, իսկ պատկան մարմինները չեն ասում՝ երբ կկարողանան մեկնել: Այս մասին Tert.am-ի հետ զրույցում ասաց այդ քաղաքացիներից Գարիկ Խառատյանը:

Նրա տեղեկացմամբ՝ այդ անձանց մի մասը հենց ՌԴ քաղաքացիներ են, մյուսներն էլ մեկնելու հիմքեր ունեն՝ ընտանիքներն այնտեղ են գտնվում:

Քաղաքացու խոսքով՝ իրենց ասել են, որ սեփական ավտոմեքենաներով չեն կարող հատել սահմանը, բայց եթե իրենք վարձեն ավտոբուս, կկազմակերպեն մեկնումը: «Մենք էլ տոկոսներով, պարտքերով, դժվարությամբ ուղարկել ենք մեր ավտոմեքենաները: Լուծել ենք նաև ավտոբուսի խնդիրը, բայց այժմ էլ ոչինչ չեն ասում»,- ներկայացրեց Գարիկ Խառատյանը:

Նրա խոսքով՝ ՌԴ դեսպանատնից էլ նշել են, թե իրենց ընդունելու որևէ խնդիր չունեն, այս պահին միակ հարցը Վրաստանի կողմի հետ բանակցություններն են:

«Ասացին՝ մեր հարցը կլուծվի, բայց արդեն 20 օր է՝ ոչ մի որոշակիություն չկա: Նստարաններին ենք քնում: Այն ժամանակ գոնե մեքենա կար, դրանց մեջ էինք քնում: Արդեն ո´չ առաջ, ո´չ հետ գնալու հնարավորություն չի մնացել: Ասում են՝ լուծվելու է խնդիրը, բայց օր, ժամ, ոչինչ չեն ասում: Մարդկանց ձեռքին գումար էլ չի մնացել»,-ասաց նա:

Ըստ քաղաքացու՝ անորոշությունը մեկ այլ խնդիր ևս առաջացնում է. սահմանն անցնելու համար իրենք պետք է կորոնավիրուսի թեստ հանձնեն, իսկ դա ժամանակատար ու ծախսատար գործողություն է, պետք է նախապես իմանան, որ հասցնեն. «Եթե 1 ժամվա մեջ ասեն՝ բացում ենք Վրաստանի միջանցքը, ո՞նց ենք հասցնելու թեստը հանձնել, թուղթն ունենալ, դրա համար մեզ հստակություն է պետք»,-ասաց նա: