Պահանջում ենք չեղյալ համարել Լիդիանին տրված փորձագիտական դրական եզրակացությունը. Ամուլսարի հանքի շահագործման դեմ ակցիայի մասնակիցները վարչապետին ուղղված նամակ հանձնեցին Կառավարության ներկայացուցչին

18:47 • 20.08.20

Կառավարության դիմաց Ամուլսարի հանքի շահագործման դեմ բողոքողների մոտ իջավ Կառավարության ներկայացուցիչը և վերցրեց նրանց նամակ-պահանջը՝ ուղղված Շրջակա միջավայրի նախարար Ռոմանոս Պետրոսյանին և ՀՀ վարչապետ Նիկոլ Փաշինյանին:

Մինչ այդ ՀԲՃ անդամ Լևոն Գալստյանը կարդաց նամակը: Նամակում նշված էր, որ կարիք չեն տեսնում կրկնել Ամուլսարի շուրջ վերջին առնվազն ութ տարում ներկայացված փորձագիտական հիմնավորումները Հայաստանի և մասնավորապես Վայոց Ձորի մարզի էկոլոգիայի, ջրային պաշարի, տնտեսության տարբեր ճյուղերի վրա բացասական ազդեցությունների վերաբերյալ:

«Մենք հիմք ենք ընդունում անցած տարի «Էլարդ» միջազգային փորձագիտական ընկերության զեկույցը, որը պատվիրել էր ՀՀ-ն: Զեկույցում հստակ մատնաշվում է, որ Լիդիան ընկերության՝ շրջակա միջավայրի վրա ազդեցության գնահատմամբ և տրամադրած փաստաթղթերի հիման վրա հնարավոր չէ եզրակցություն տալ, ուստի անհրաժեշտ է նոր ու գիտականորեն հիմնավորված ՇՄԱԳ: Կառավարությունից պահանջում ենք՝ 2016 թվականին տրված փորձաքննական դրական եզրակացությունը չեղյալ համարել: Որևէ այլ միջանկյալ գործողություն, որի հիմքով այս ծրագրի կյանքը կերկարացվի, կլինի ՀՀ օրենքների, ՀՀ վարչապետ Նիկոլ Փաշինյանի՝ միջազգային փորձաքննություն անցկացնելու խոստման կոպիտ խախտում»,-ասված էր նամակում:

Լևոն Գալստյանը նշեց, որ խոստումը կատարելու փոխարեն ոչինչ չարվեց, սառեցվեց ծրագիրը, դրանից հետո մեկուկես տարի ամբողջ բեռը մնաց տեղի բնակիչների և քաղաքացիների ուսերին, որոնք խափանեցին այդ ծրագրի շարունակությունը:

«Մենք պահանջում ենք կատարել այդ խոստումը, որ տրվել է ՀՀ քաղաքացիներին»,- հավելեց նա:

Նամակը հանձնելուց հետո բողոքի ակցիայի մասնակիցները երթով գնացին Շրջակա միջավայրի նախարարության շենքի մոտ, ակցիան շարունակվում է այնտեղ։