Դաղստանում բնակելի տան բակում մարդկային կմախքներով ու հնագույն կենցաղային իրերով լի երկու սենյակ են հայտնաբերել (լուսանկարներ)
Դաղստանի Դախադաևսկի շրջանի Ուրկարախ գյուղի բնակիչն իր տան բակում մարդկային կմախքներով ու հնագույն կենցաղային իրերով լի երկու սենյակ է հայտնաբերել, հայտնում է «ՌԻԱ Նովոստի» գործակալությունը՝ հղում տալով շրջանի վարչակազմի հայտարարությանը։
«Աբդուլհամիդ Միրզաևը որոշել է իր տանը կապիտալ վերանորոգում իրականացնել, սակայն բակի բարեկարգման աշխատանքները երկար չեն տևել, քանի որ 5-6 մետր խորության վրա երկու սենյակ է հայտնաբերվել․ դարակների վրա սափորներ, իսկ սենյակի մեջտեղում՝ կմախքներ են եղել»,- նշվել է Դախադաևսկի շրջանի ինսթագրամյան էջում արված հրապարակման մեջ։
Նշվում է, որ այդ սենյակների պատմության հետազոտության համար հնագետների խումբը ժամանելու է երկուշաբթի։
«Հույս ունենք, որ դրանց հետազոտությունը լույս կսփռի նախկինում տեղի ունեցած դեպքերի վրա, քանի որ գտածոն լուրջ մտահոգության առիթ է տվել և՛ տանտերերին, և՛ նրանց հարևաններին»,- ասվում է հաղորդագրության մեջ։











