Գերմանիայում բացատրել են՝ ինչու էին ցուցարարները Բեռլինում տեղի ունեցող ցույցի ժամանակ «Պուտին» վանկարկում
Բեռլինում շաբաթ տեղի ունեցած կորոնավիրուսային սահմանափակումների դեմ բողոքի ցույցի մասնակիցները «Պուտին» էին վանկարկում՝ ՌԴ առաջնորդի հանդեպ հարգանքից ելնելով:
РИА Новости-ի փոխանցմամբ՝ այս մասին հայտնել է Ներկայացուցիչների քաղաքային պալատի պատգամավոր Գուննար Լինդեմանը («Այլընտրանք Գերմանիայի համար»): Վերջինիս խոսքով՝ Պուտինը հեղինակություն է վայելում գերմանացիների շրջանում, և ցուցարարները որոշել են գալ ռուսական դեսպանատան մոտ, որպեսզի «ուշադրություն հրավիրեն Գերմանիայում տիրող պայմանների» նկատմամբ՝ հուսալով, որ Ռուսաստանը կկարողանա ազդել կանցլեր Անգելա Մերկելի վրա:
«Իմ կարծիքով՝ Ռուսաստանի դեսպանության համար վտանգ ոչ մի անգամ չի առաջացել»,- ասել է պատգամավորը:
Հիշեցնենք, որ շաբաթօրյա ցույցին մոտ 20 000 մարդ էր փողոց դուրս եկել գերմանական մայրաքաղաքում՝ իրենց դժգոհությունը հայտնելու կորոնավիրուսի հարցում կառավարության վարած քաղաքականության դեմ:










