Հոնկոնգի ոստիկանությունը բողոքի ցույցի ժամանակ 12-ամյա աղջկա է ձերբակալել. տեսանյութն իրարանցում է առաջացրել օգտատերերի շրջանում (տեսանյութ)

11:31 • 07.09.20

Հոնկոնգում տեղի ունեցող հակակառավարական բողոքի ցույցերից մեկի ժամանակ ոստիկանները գրենական պիտույքներ ձեռք բերելու համար փողոց դուրս եկած 12-ամյա աղջկա են ձերբակալել. ոստիկանների կոպիտ գործողությունների տեսանյութը հայտնվել է համացանցում և մեծ իրարանցում առաջացրել օգտատերերի շրջանում, գրում է The Guardian պարբերականը։

Տեսանյութում երևում է, թե ինչպես է աղջնակը փորձում փախչել ոստիկաններից, սակայն իրավապահներից մեկը նրան ուժով պառկեցնում է գետնին ու հենվում վրան՝ ձեռնաշղթաներ հագցնելու նպատակով։ Ոստիկանությունից ավելի ուշ հաստատել են աղջկա ձերբակալության լուրը, սակայն նշել են, թե վերջինս «կասկածելի կերպով» է փախուստի դիմել, ինչն էլ իրավապահներին ստիպել է նման կերպ արձագանքել։

Աղջկա մայրն էլ, իր հերթին, հայտարարել է, որ պատրաստվում է բողոք ներկայացնել ոստիկանության դեմ, քանի որ իր դուստրն ու 20-ամյա որդին համավարակի պամաններում ցույցի մասնակցելու համար տուգանվել են այն պարագայում, որ նրանք փողոց են դուրս եկել միայն խանութ մտնելու նպատակով։ Կինը նշել է նաև, որ աղջիկը ոստիկաններից փորձել է փախչել, քանի որ վախեցել է ստեղծված իրավիճակից։

Աղբյուրը մանրամասնում է, որ Հոնկոնգում հուլիսի 1-ից մեկնարկած բողոքի ցույցերը պարբերաբար ճնշվում են ոստիկանության կողմից, քանի որ դրանք համավարակի պայմաններում օրինական չեն համարվում և վտանգի տակ են դնում մարդկանց անվտանգությունը։