Ի՞նչ կարիք կա եվրոպական «գրին քարտի» գոտի մտնելու, եկեք մտնենք աֆրիկյան «սեռի քարտի» գոտի, միևնույն է, ոչ մի բեռնափոխադրում չունենք. Արթուր Դալլաքյանը՝ փոխնախարարին (տեսանյութ)
Ազգային ժողովի տնտեսական հարցերի մշտական հանձնաժողովում այսօր քննարկեց «Ավտոմոբիլային տրանսպորտի մասին» օրենքում փոփոխություններ և լրացումներ կատարելու մասին և Վարչական իրավախախտումների վերաբերյալ ՀՀ օրենսգրքում փոփոխություն և լրացումներ կատարելու մասին հարցը:
«Բարգավաճ Հայաստան» խմբակցության պատգամվոր Արթուր Դալլաքյանը նշեց, որ իրենք
առաջարկել են ուղևորների պարտադիր ապահովագրության դեպքը, ինչի հետ նախարարությունը համակարծիք չէ: ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանը նշեց, որ ուղևորների ապահովագրումը կարգավորվում է օրենքով և իրենք նպատակահարմար են գտնում «գրին քարտին» անդամակցելու հարցը:
Արթուր Դալլաքյանը ներկայացրեց, թե ինչ է իրենից ներկայացնում «գրին քարտ» ասվածը: «Այն իրենից ներկայացնում է եվրոպական ապահովագրման համակարգ, շատ լավ, հաճելի բան է, դրան նաև Ռուսաստանը, Ուկրաինան, Բելառուսը, Իրանը և Թուրքիան են միացել և այս տարածաշրջանում միայն մենք և Վրաստանը չենք միացել: Բայց հարցի երկրորդ կողմն այն է, որ մենք որևէ տեսակի ուղևորափոխադրում չունենք Եվրոպայի հետ»,- ասաց նա և կոչ արեց հայկական ապահովագրության տարբերակ ընտրել:
«Այսինքն՝ ի՞նչ կարիք կա «գրին քարտ»–ի գոտի մտնելու, եկեք մտնենք աֆրիկյան «սեռի քարտի» գոտի, ասիականը՝ «դեղին քարտի» գոտի, միևնույն է, ոչ մի բեռնափոխադրում չունենք»,-ասաց նա և նշեց, որ մյուս երկրները մտել են, քանի որ կանոնավոր փոխադրումներ ունեն:
Պատգամավորը տեղեկացրեց, որ 50 տեղանոց ուղևորատար տրանսպորտային միջոցը «գրին քարտով» ապահովագրելու արժեքը 1900 դոլար է մեկ տարվա համար:
Փոխնախարարը պարզաբանեց, որ դրա պատճառներից մեկն այն է, որ ուղևորափոխադրումները, բեռնափոխադրումները եվրոպական պահանջներին որոշ դեպքերում չեն համապատասխանում և չեն կարողանում մուտք գործել տարածք:
Արթուր Դալլաքյանը խնդրեց տալ ինֆորմացիա, թե «գրին քարտ» գոտի ինչ ուղևորափոխադրումներ, բեռնափոխադրումներ կան հայկական պետհամարանիշով։ Փոխնախարարն ասաց, որ կանոնավոր փոխադրումներ ունենք Իրանի հետ, վեց կազմակերպություն է իրականացնում: «Չունեք, ինչի՞ եք սուտ ասում, չի կարելի ինֆորմացիան սխալ ասել»,- արձագանքեց Արթուր Դալլաքյանը և նշեց, որ մոտ 30 տարի Հայաստանը չունի կանոնավոր ուղևորափոխադրումներ Իրանի հետ և կան միակողմանի սպասարկողներ, որն իրականացնում են իրանական տրանսպորտային միջոցները:
Հանձնաժողովի նախագահ Բաբկեն Թունյանը միացավ «Լուսավոր Հայաստան» խմբակցության պատգամավոր Արկադի Խաչատրյանի առաջարկին՝ մասամբ ընդունել նախագիծը՝ առանց ապահովագրության հարցը ներառելու։ Նախագիծն ընդունվեց այդ տեսքով։










