Ընդդիմադիր պատգամավորները եկան, բա դուք ո՞ւր եք, ձեզ եմ ձայն տվել. վախկոտների նման փախչելով չի. Մանուել Մանուկյանը՝ իշխանական պատգամավորներին (տեսանյութ)
Եթե կա մի համարձակ պաշտոնյա, ղեկավար, որը ճշմարիտ է, հրավիրում ենք քննարկման, որ պատասխան տա մեր բոլոր հարցերին: Եթե չկա այդպիսի մեկը, մենք այլ բաներ ենք արձանագրելու: Այս մասին Կառավարության դիմաց «Ոչ վարկային թալանին» նախաձեռնության անդամների բողոքի ակցիայի ընթացքում հայտարարեց Մանուել Մանուկյանը:
Նա նշեց՝ այնտեղ եկել են ընդդիմադիր պատգամավորներ, բայց որտե՞ղ են իշխանական պատգամավորները:
«Ու՞ր եք, ձեզ էլ ենք սպասում, եկեք, ձեզ ենք ամենաշատը սպասում, որովհետև ինքս ձեզ եմ ձայն տվել, եկեք՝ տեսնեմ՝ ուր եք փախել: Եկեք պատասխան տվեք, ասում եք՝ լավ է լինելու, բա ու՞ր եք, վախկոտների նման փախչելով չէ: Պարո՛ն Փաշինյան, սպասում ենք Ձեզ, չեք կարողանալու այս շենքից գնալ, Ձեր տուն ենք գալու, գիշեր-ցերեկ վանկարկելու ենք, նստելու ենք Ձեր դարպասների մոտ: Այնքան ենք անելու, որ հասկանաք՝ մեր կամքը ամուր է քարից էլ»,-ասաց նա:
Ակցիայի մեկ այլ մասնակից ընդգծեց՝ ԿԲ նախագահ Մարտին Գալստյաննն է իրենց ուղղորդել դեպի Կառավարություն ու ԱԺ, մինչդեռ վերջիններս խնդրին լուծում չեն տալիս. «Նիկոլ Փաշինյանն իմ վարչապետը չէ, դա իմ սեփական կարծիքն է»,-հավելեց նա:
Հիշեցնենք, որ ակցիայի մասնակիցները պահանջում են մեկ տարի վարկային արձակուրդ՝ նշելով, թե կորոնավիրուս ընթացքում ՀՀ-ն նաև գումարներ է ստացել արտերկրից, ինչը հնարավորություն կտա արձակուրդ տալ: Մինչ այս ակցիան՝ քաղաքացիները 13 օր նստացույց են իրականացրել Կենտրոնական բանկի մոտ:
Մանրամասները՝ տեսանյութում:










