Մոնրեալում հարյուրավոր հայեր բողոքի ակցիա են անցկացրել քաղաքապետարանի դիմաց՝ կոչ անելով ճանաչել Արցախի անկախությունը (տեսանյութ)
Կանադայի մեծությամբ երկրորդ քաղաք Մոնրեալում հայ համայնքի հարյուրավոր ներկայացուցիչներ հինգշաբթի հավաքվել են քաղաքապետարանի դիմաց՝ պահանջելով ԼՂ հակամարտության հարցում քաղաքապետ Վալերի Պլանտի աջակցությունը, գրում է Global News-ը։
Ցուցարարները ցանկություն են հայտնել, որ Պլանտը դատապարտի հայերի դեմ Ադրբեջանի ագրեսիան և կոչ անի խաղաղություն հաստատել Լեռնային Ղարաբաղում։
Հայ համայնքի ներկայացուցիչները նաև կոչ են արել պաշտոնապես ճանաչել Արցախի Հանրապետության անկախությունը։
«Արցախն անկախություն էր խնդրում 30 տարի առաջ, և այժմ մենք խնդրում ենք միջազգային հանրությանը ճանաչել դա»,- ասել է Քվեբեկի Հայ ազգային կոմիտեի ներկայացուցիչ Աբրահամ Նիզիբլյանը՝ հավելելով, որ դա կայուն խաղաղություն ապահովելու միակ միջոցն է։
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 16-ի դրությամբ Արցախի զինուժը խոցել է հակառակորդի՝ 16 ուղղաթիռ, 20 ինքնաթիռ, 180 անօդաչու թռչող սարք, 546 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 5839 զոհ։ Հայկական կողմից, նախնական տվյալներով, կա 604 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 32 քաղաքացիական անձ, վիրավորվել է 106 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։ Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։
Տեսանյութը կարող եք դիտել այստեղ։










