Առնվազն 2 կատաղի գրոհներից հետո հյուսիսային ուղղությամբ մեր զինուժին հաջողվել է հետ շպրտել հակառակորդին, որին չի հաջողվել գրավել ոչ մի դիրք․ Արծրուն Հովհաննիսյան (տեսանյութ)

22:01 • 16.10.20

Այսօր վաղ առավոտյան ադրբեջանական զինված ուժերը և՛ հյուսիում, և՛ հարավում երկար հրետակոծությունից, հրետանային պատրաստությունից հետո, որի ընթացքում կիրառվում են նաև այլ օդային հարձակման միջոցներ, ԱԹՍ-ներ, հրթիռներ, օդուժ, անցել են լայնածավալ հարձակման: Այս մասին Հայկական միասնական տեղեկատվական կենտրում կայացած մամուլի ասուլիսին ասաց ՊՆ ներկայացուցիչ Արծրուն Հովհաննիսյանը:

Նա ընդգծեց՝ առնվազն երկու կատաղի գրոհներից հետո հյուսիսային ուղղությամբ մեր Զինված ուժերին հաջողվել է հետ շպրտել ադրեբջանական զինուժն, ահաբեկիչներին և այլ խմբավորումներին, որոնց չի հաջողվել գրավել ոչ մի բարձրունք, ոչ մի դիրք:

«Հարավային ուղղությամբ ամբողջ օրը շարունակվել են ծանր մարտերը. որոշ ուղղություններով մեր զորքերը կատարել են վերախմբավորումներ: Մինչև այս պահն ընթանում են դժվար ու ծանր մարտեր՝ հատկապես հարավային ուղղությամբ: Օրվա ընթացքում ադրբեջանական օդուժը կատարել է նաև որոշակի թռիչքներ, այդ ընթացքում մարտական հարվածներ են հասցրել, այդ ընթացքում մեզ հաջովղվել է ոչնչացնել որոշ թռչող սարքեր, որոնք դեռ իդենտիֆիկացված չեն, լրացուցիչ կներկայացնենք»,- հայտնեց նա:

Հարցին՝ ինչու է հայկական կողմը հումանիզմ դրսևորում արդբեջանական գերիների նկատմամբ, Արծրուն Հովհաննիսյանն ընդգծեց. «Որովեհտև մենք մարդ ենք և ունենք համապատասխան արժեհամակարգ, մենք բորենիներ չենք»:

Անդրադառնալով Հադրութում տիրող իրավիճակին՝ նա ասաց, որ իրավիճակը չի փոխվել, վերջին 2-3 օրերի ընթացքում իրավիճակը որպես կանոն նույնն է:

Մանրամասները՝ տեսանյութում: