ՄԱԿ-ի գլխավոր քարտուղարը մտահոգված է Լեռնային Ղարաբաղում հրադադարի պայմանավորվածության չպահպանմամբ

03:38 • 17.10.20

ՄԱԿ-ի գլխավոր քարտուղար Անիտոնիո Գուտերեշը մտահոգված է Լեռնային Ղարաբաղում առկա իրավիճակով, ТАСС-ի փոխանցմամբ՝ հայտարարել է Գուտերեշի պաշտոնական ներկայացուցիչ Ստեֆան Դյուժարրիկը:

«Միանգամայն ակնհայտ է, որ ՄԱԿ գլխավոր քարտուղարը լրջորեն մտահոգված է կողմերի շարունակվող գործողություններով ու քաղաքացիական բնակչության համար դրանց ունեցած հետևանքներով: Մենք չափազանց մտահոգված ենք քաղաքացիական բնակչության շրջանում կորուստներով: Անհրաժեշտ է կրկին հստակ դատապարտել քաղաքացիական բնակչության ու ենթակառուցվածքների դեմ ուղղված ցանկացած գործողություն»,- նշել է Դյուժարրիկը:

Նրա խոսքով՝ Գուտերեշը շարունակում է անձնապես մասնակցել խնդրի քննարկումների ու կապ պահպանում Հայաստանի և Ադրբեջանի արտաքին քաղաքական գերատեսչությունների հետ:

«Նրա՝ երկու կողմին ուղղված կոչի էությունը շատ պարզ է. չափազանց կարևոր է, որ նրանք լիարժեք կերպով իրականացնեն ու պահպանեն կրակի դադարեցման պայմանավորվածությունը, որը նրանք համաձայնեցրել են որպես առաջնահերթ միջոցառումներ՝ հումանիտար ընկալումների ելնելով: ՄԱԿ-ը պատրաստ է հումանիտար օգնություն ցուցաբերել՝ նման դիմում ստանալու դեպքում, և պատրաստակամ է աշխատել բոլոր շահագրգիռ կողմերի հետ»,- շեշտել է Գուտերեշի ներկայացուցիչն՝ ընդգծելով, որ իրավիճակը շատ արագ է փոփոխվում, և կարևոր է, որ կողմերն ավելի արագ քայլեր ձեռնարկեին իրավիճակը կայունացնելու ուղղությամբ, քանի որ կոնֆլիկտի ընդլայնման և տարածաշրջանում իրադրության էլ ավելի ապակայունացման վտանգ կա:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 16-ի դրությամբ Արցախի զինուժը խոցել է հակառակորդի՝ 16 ուղղաթիռ, 21 ինքնաթիռ, 181 անօդաչու թռչող սարք, 552 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 5839 զոհ։ Հայկական կողմից, նախնական տվյալներով, կա 633 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 33 քաղաքացիական անձ, վիրավորվել է 106 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։