Մի փոքր զավեշտալի է, երբ դուք, տղաներ, խոսում եք «ֆեյք լուրեր»-ի մասին. Bild-ի գլխավոր խմբագիրը Գերմանիայում Ադրբեջանի դեսպանությանը հորդորել է Ալիևից ճշտել հարցազրույց տալու տեղեկությունը

01:14 • 22.10.20

Ադրբեջանի նախագահի օգնական Հիքմեթ Հաջիևը չորեքշաբթի, պատասխանելով գերմանական Bild թերթի թղթակցին, հայտնել է, թե երկրի նախագահ Իլհամ Ալիևը նախընտրում է հարցազրույցներ չտալ դեղին մամուլին: 

Bild-ի գլխավոր խմբագիր Փոլ Ռոնժեյմերը թվիթերյան իր էջում ավելի վաղ գրել էր, որ Ադրբեջանի նախագահ Իլհամ Ալիևը համաձայնել է հարցազրույց տալ թերթին, «իսկ այժմ, հանկարծ չի ուզում»: Նա հստակեցրել էր, որ հենց ադրբեջանական կողմն է առաջարկել հարցազրույց վերցնել նախագահից:

«Ադրբեջանական իշխանությունների անունից Ձեր հայտարարությունը ոչ պրոֆեսիոնալ է: Իմ նախագահն առաջարկում է հարցազրույց տալ պրոֆեսիոնալներին, այլ ոչ թե դեղին ԶԼՄ-ի»,- գրել է Հաջիևը:

Գերմանիայում Ադրբեջանի դեսպանությունն իր հերթին թվիթերյան հարթակում Ռոնժեյմերը գրառումը ֆեյք էր որակել:

Ավելի ուշ Ռոնժեյմերը, արձագանքելով Ադրբեջանի դեսպանատան թվիթին, հորդորել է տեղեկությունը ճշտել հենց Իլհամ Ալիևից:

«Լավ, զանգահարեք ձեր նախագահին և հարցրեք նրան: Մենք ստացել ենք այս շաբաթ տեսազանգով հարցազրույցի հաստատում: Ինչևէ, մի փոքր զավեշտալի է, երբ դուք, տղաներ, խոսում եք «ֆեյք լուրեր»-ի մասին, մտածում եմ՝ չի օգնում»,- գրել է Ռոնժեյմերը:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 21-ի դրությամբ Արցախի զինուժը խոցել է հակառակորդի՝ 16 ուղղաթիռ, 23 ինքնաթիռ, 202 անօդաչու թռչող սարք, 580 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 6459 զոհ։ Հայկական կողմից, նախնական տվյալներով, կա 834 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 36 քաղաքացիական անձ, վիրավորվել է 115 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։
Արդեն երկու անգամ հայտարարվել է մարդասիրական հրադադարի մասին, սակայն ադրբեջանական զինուժը դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։