Գեղարքունիքի մարզում խոցվել է հակառակորդի 4-րդ ԱԹՍ–ն
Գեղարքունիքի մարզի Ակունք գյուղի տարածքում ժամը 21:30-ի սահմաններում խոցվել է հակառակորդի չորրորդ ԱԹՍ-ն, այս մասին տեղեկացնում է Պաշտպանության նախարարության մամուլի խոսնակ Շուշան Ստեփանյանը։
ՊՆ խոսնակն այսօր ավելի վաղ տեղեկացրել էր ևս երեք ԱԹՍ–ի խոցման մասին։ Մասնավորապես, մեկ ԱԹՍ խոցվել էր ժամը 21։00-ի սահմաններում Մեծ Մասրիկ-Սոթք հատվածում։
Մեկ այլ ԱԹՍ խոցվել է Մեծ Մասրիկ-Սոթք հատվածում ժամը 20:15-ի սահմաններում։ Դրանից առաջ ՀՕՊ ստորաբաժանումների կողմից Գեղարքունիքի մարզի Շատջրեք գյուղի հատվածում ժամը 20։00-ի սահմաններում խոցվել էր հակառակորդի մեկ այլ ԱԹՍ։
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 50 քաղաքացիական անձ, վիրավորվել է 148 քաղաքացիական անձ։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։ Արդեն երեք անգամ հայտարարվել է մարդասիրական հրադադարի մասին, սակայն ադրբեջանական զինուժը խախտել է այն։











