Ամերիկյան Trimble Navigation ընկերությունը դադարեցնում է GPS ընդունիչների վաճառքը թուրքական «Բայրաքթար» անօդաչուների համար

22:27 • 04.11.20

Ամերիկայի «Հայ դատի» հանձնախումբը հայտնել է, որ ամերիկյան ընկերությունը դադարեցնում է GPS ընդունիչների վաճառքը թուրքական անօդաչուների համար, որոնք ադրբեջանական ուժերը կիրառում են Արցախի դեմ պատերազմում:

«Կալիֆոռնիայի Սաննիվեյլ քաղաքում գործող Trimble Navigation ընկերությունը, որը GPS ընդունիչներ է արտադրում, որոնք կիրառվում են թուրքական «Բայրաքթար» անօդաչուներում, արձագանքել է բողոքի ալիքին՝ հաստատելով, որ դադարեցնում է հետագա վաճառքը անօդաչուների համար»,- ասվում է հաղորդագրության մեջ:  

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 50 քաղաքացիական անձ, վիրավորվել է 148 քաղաքացիական անձ։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։ Արդեն երեք անգամ հայտարարվել է մարդասիրական հրադադարի մասին, սակայն ադրբեջանական զինուժը խախտել է այն։