Լոս Անջելեսի բնակիչը սպառնացել է Բայդենի հաղթանակի դեպքում զանգվածային սպանություններ իրագործել. տղամարդը ձերբակալվել է (լուսանկարներ, տեսանյութ)
Լոս Անջելես քաղաքում Հետաքննությունների դաշնային բյուրոյի աշխատակիցները ձերբակալել են մի տղամարդու, որը խոստացել էր նախագահական ընտրություններում Դեմոկրատական կուսակցության թեկնածու Ջո Բայդենի հաղթանակի դեպքում զանգվածային սպանություններ կազմակերպել, հաղորդում է Daily Mail-ը։
39-ամյա Բենջամին Պատինոն ձերբակալվել է սոցիալական ցանցերում զանգվածային սպանությունների սպառնալիքներ հնչեցնելուց հետո։ Իրավապահները տեղեկացել են Instagram-ում վերջինիս հրապարակած տեսանյութի մասին, որտեղ տղամարդը սպառնացել է, որ կհետևի «դպրոցական հրաձիգների» օրինակին, եթե Բայդենը զբաղեցնի նախագահի պաշտոնը: Տեսանյութում տղամարդը նաև կոչ է արել «հեռացնել բոլոր դեմոկրատներին»։
Քննիչները խուզարկել են ձերբակալվածի տունը։ Նշվում է, որ կասկածյալը գտնվում է կալանքի տակ, ենթադրաբար՝ հոգեկան առողջության հետագա ստուգման համար։
Հիշեցնենք, որ նոյեմբերի 3-ին ԱՄՆ-ում կայացել են նախագահի ընտրություններ, որոնցում երկրի գործող նախագահ Դոնալդ Թրամփի մրցակիցը դեմոկրատական կուսակցության ներկայացուցիչ, երկրի նախկին փոխնախագահ Ջո Բայդենն է:
Բայդենը նաև ստացել է ընտրիչի 264, իսկ գործող նախագահ Դոնալդ Թրամփը՝ 214 ձայն։ Հաղթանակի համար հարկավոր է հավաքել ընտրիչների 270 ձայն։
Քվեարկության արդյունքները դեռ չեն ամփոփվել, սակայն ավելի վաղ գործող նախագահ Դոնալդ Թրամփը խոստացել էր հանդես գալ հայտարարությամբ և հայտարարել ընտրություններում հաղթանակի մասին: Բացի այդ, գործող նախագահն ասել էր, որ ինքն արդեն հաղթել է: Թրամփը նաև նշել էր, որ դեմոկրատները փորձում են «գողանալ իր հաղթանակը»։














