WarGonzo-ն տեսանյութ է հրապարակել Ստեփանակերտից՝ ըմբշամարտիկ Միհրան Հարությունյանի հետ ներկայացնելով իրավիճակը քաղաքում

22:14 • 07.11.20

Ռուսական WarGonzo նախագծի հեղինակ Սեմյոն Պեգովը տեսանյութ է հրապարակել՝ ներկայացնելով ներկա իրադրությունը Ստեփանակերտում և Շուշիում:

Ինչպես նշում է ռուս զինթղթակիցը, ողջ օրը Շուշիում Արցախի պաշտպանության բանակի զինվորները հետ են մղել ադրբեջանական դիվերսիոն խմբերին:

Վերջինս տեսանյութը հրապարակել է մայրաքաղաք Ստեփանակերտից, որտեղ զրուցել է ըմբշամարտիկ Միհրան Հարությունյանի հետ, որն այս օրերին զինվորների հետ միասին կռվում է առաջնագծում:

«Ես իմ քույրերի ու եղբայրների հետ եմ: Այստեղ աղջիկները նույնպես պայքարում են առաջնագծում: Տղամարդիկ նույնպես այստեղ են, չեն հեռացել և վստահ եմ, որ կմնան: Մենք պատրաստ ենք ամեն ինչի»,- ասել է մարզիկը:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 49 քաղաքացիական անձ, վիրավորվել է 144 քաղաքացիական անձ։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։

Արդեն երեք անգամ հայտարարվել է մարդասիրական հրադադարի մասին, սակայն ադրբեջանական զինուժը խախտել է այն։